Ensampel an Rekabysi

1An ger hag a dheuth dhe Yeremia a-dhiworth an Arloedh yn dydhyow Yehoyakim mab Yosia myghtern Yuda, ow leverel: 2Ke dhe ji an Rekabysi ha kewsel dhedha, ha'ga dri dhe ji an Arloedh, a-ji dhe onan a'n chambouryow, ha ri dhedha gwin dhe eva. 3Ytho my a gemmeras Yaazania mab Yeremia mab Habassinia, ha'y vreder, hag oll y vebyon, ha chi kowal an Rekabysi. 4My a's dros dhe ji an Arloedh yn chambour mebyon Hanan mab Ygdalia, gour Duw, hag esa ogas dhe jambour an bennsevigyon, a-ugh stevell Maaseya mab Shallum, gwithyas an treudhow. 5Ha my a settyas a-rag an Rekabysi podigow leun a win, ha hanafow; ha my a leveris dhedha, ‘Evewgh gwin.’ 6Mes i a worthybis, ‘Ny evyn gwin vytholl, rag agan tas Yonadab mab Rekab a worhemmynnis dhyn, “Nevra ny evowgh gwin, na hwi na'gas fleghes; 7na ny drehevowgh chi, na gonedha has; na ny blansowgh gwinlann, na'y fewa; mes hwi a vydh trigys yn tyldow oll agas dydhyow, may fewowgh lies dydh y'n tir may fydhowgh estrenyon.” 8Yndellma ni re woslowas orth lev Yonadab mab Rekab agan tas yn pup-tra a worhemmynnis dhyn, ma na evyn gwin vyth yn agan dydhyow, ni, na'gan gwragedh, na'gan mebyon, na'gan myrghes, 9na dhe dhrehevel chiow dhe driga ynna. Ny'gan beus gwinlann na gwel na has; 10mes ni re beu trigys yn tyldow, ha bos gostydh, ha gul pup-tra re worhemmynnis agan tas Yonadab dhyn. 11Mes pan dheuth Nebukadnessar myghtern Babylon erbynn an tir, ni a leveris, “Dewgh ha deun dhe Yerusalem drefenn own lu an Kaldeanys ha lu Aram.” Drefenn henna yth eson trigys yn Yerusalem.’

12Ena ger an Arloedh a dheuth dhe Yeremia: 13Yndellma y lever Arloedh an luyow, Duw Ysrael: Ke ha leverel dhe bobel Yuda ha dhe annedhysi Yerusalem, ‘A ny vynnowgh degemmeres dyskans ha klewes ow geryow? yn-medh an Arloedh. 14Geryow Yonadab mab Rekab a worhemmynnis dh'y vebyon, na effens gwin, re beu kowlwrys; ha ny evons byth bys y'n jydh ma, rag i re beu gostydh dhe worhemmynn aga thas. Mes my ow honan re gewsis orthowgh heb lett, ha ny woslewsowgh orthiv. 15My re dhannvonas dhywgh oll ow servysi an brofoesi, orth aga dannvon arta hag arta, ow leverel, “Treylyewgh lemmyn pub ahanowgh a'gas fordh dhrog, ha gwellhe agas gwriansow ha nag ewgh war-lergh duwow erell dh'aga servya, ha hwi a vydh trigys y'n tir a res dhywgh ha dh'agas tasow.” Mes ny ystynnsowgh agas skovarn na goslowes orthiv. 16Mebyon Yonadab mab Rekab re gollenwis an gorhemmynn a ros aga thas dhedha, mes ny woslowas orthiv an bobel ma. 17Ytho, yndellma y lever an Arloedh, Duw an luyow, Duw Ysrael: My a dhre war Yuda ha war oll annedhysi Yerusalem pub terroes re leveris er aga fynn; rag my re gewsis dhedha ha ny woslowsons, my re elwis dhedha mes ny worthybsons.’

18Mes dhe ji an Rekabysi Yeremia a leveris: Yndellma y lever Arloedh an luyow, Duw Ysrael: Drefenn hwi dhe vos gostydh dhe worhemmynn Yonadab agas tas, ha gwitha oll y worhemmynnow, ha gul pup-tra a worhemmynnis dhywgh, 19yndellma ytho y lever Arloedh an luyow, Duw Ysrael: Ny vydh Yonadab mab Rekab heb gour dhe sevel a-ragov bys vykken.