An Rol-skrifa Lennys y'n Tempel

1Y'n peswora blydhen Yehoyakim mab Yosia myghtern Yuda, an ger ma a dheuth dhe Yeremia a-dhiworth an Arloedh, ow leverel: 2Kemmer rol-skrifa ha skrifa warnedhi oll an geryow re gewsis dhis erbynn Ysrael, hag erbynn Yuda, hag erbynn oll an kenedhlow, a-dhia'n jydh may kewsis dhis, a-dhia dhydhyow Yosia bys hedhyw. 3Y hyll bos pan glewvo chi Yuda a oll an drog a vynnav gul dhedha, i oll dhe dreylya a'ga drog fordhow, may hylliv gava aga hammweyth ha'ga fegh.

4Ena Yeremia a elwis Baruk mab Neria, ha Baruk a skrifas geryow an Arloedh a-dhiworth ganow Yeremia, re gewsis dhodho, war rol-skrifa. 5Ha Yeremia a worhemmynnis dhe Baruk, ow leverel, ‘Ny'm beus entra chi an Arloedh. 6Ytho ke dha honan, ha lenn geryow an Arloedh y'n rol re skrifsys a'm ganow, yn klewans an bobel yn chi an Arloedh war dhydh penys; ha g ynwedh ty a's lenn yn klewans oll pobel Yuda a dheu yn-mes a'ga sitys. 7Y hyll bos aga fledyans dhe dhos a-rag an Arloedh, hag i oll dhe dreylya a'ga drog fordhow, rag meur yw an sorr ha konnar re leveris an Arloedh erbynn an bobel ma.’ 8Ha Baruk mab Neria a wrug pup-tra a worhemmynnis Yeremia an profoes dhodho a-dro dhe lenna y'n rol-skrifa geryow an Arloedh yn chi an Arloedh.

9Y'n pympes blydhen a Yehoyakim mab Yosia myghtern Yuda, y'n nawves mis, oll an bobel yn Yerusalem hag oll an bobel a dheuth a sitys Yuda dhe Yerusalem a elwis penys a-rag an Arloedh. 10Ena, Baruk a lennas geryow Yeremia y'n rol-skrifa, yn chi an Arloedh, yn chambour Gemaria mab Shafan an skrifennyas, esa y'n klos ughella, orth entrans Yet Nowydh chi an Arloedh, yn klewans oll an bobel.

An Rol-skrifa Lennys y'n Lys

11Mikaya mab Gemaria mab Shafan pan glewas oll geryow an Arloedh mes a'n rol-skrifa, 12ev eth war-nans dhe ji an myghtern yn chambour an skrifennyas; hag otta, oll an bennsevigyon o esedhys ena: Elishama an skrifennyas, Delaya mab Shemaia, Elnathan mab Akbor, Gemaria mab Shafan, Sedekia mab Hanania, ha'n bennsevigyon oll. 13Ha Mikaya a leveris dhedha oll an geryow re glewsa, pan lennas Baruk an rol-skrifa yn klewans an bobel. 14Ena oll an bennsevigyon a dhannvonas Yehudi mab Nethania mab Shelemia mab Kushi dhe Baruk, ow leverel, ‘Doro an rol-skrifa a lennsys yn klewans an bobel, ha deus.’ Ytho Baruk mab Neria a gemmeras an rol-skrifa yn y leuv hag y teuth dhedha. 15Hag i a leveris dhodho, ‘Esedh ha'y lenna dhyn.’ Ytho Baruk a's lennas dhedha. 16Pan glewsons oll an geryow, i a dreylyas an eyl dh'y gila yn own, ha leverel dhe Baruk, ‘Yn sur ni a dheriv an geryow ma dhe'n myghtern.’ 17Ena i a wovynnas orth Baruk, ‘Lavar dhyn lemmyn, fatell wruss'ta skrifa oll an geryow ma? Ens i dhiworth y anow?’ 18Baruk a worthybis dhedha, ‘Ev a leveris dhymm oll an geryow ma a-dhiworth y anow, ha my a's skrifas gans ynk war an rol-skrifa.’ 19Ena an bennsevigyon a leveris dhe Baruk, ‘Ke hag omgeles, ty ha Yeremia, ha na as denvyth dhe wodhvos le mayth esowgh.’

Yehoyakim a Lesk an Rol-skrifa

20Hag i eth dhe'n myghtern y'n klos, wosa i dhe asa an rol-skrifa yn chambour Elishama an skrifennyas; hag i a dherivas oll an geryow dhe'n myghtern. 21Ena an myghtern a dhannvonas Yehudi dhe gyrghes an rol-skrifa, hag ev a's kemmeras a-dhiworth chambour Elishama an skrifennyas; ha Yehudi a's lennas dhe'n myghtern hag oll an bennsevigyon sevys ryb an myghtern. 22Ha'n myghtern o esedhys y'n chi-gwav y'n nawves mis, hag yth esa tan ow leski yn oeles a-ragdho. 23Dell lennas Yehudi teyr po peder folenn, ev a's troghas gans kellyllik ha'ga thewlel y'n tan y'n oeles, bys pan veu an rol-skrifa gowal kowlleskys y'n tan esa y'n oeles. 24Mes ny's teva own na ny fregsons aga dillas, naneyl an myghtern, na'y servysi neb a glewas oll an geryow ma. 25Hwath pan ynnias Elnathan ha Delaya ha Gemaria war an myghtern ma na losko an rol-skrifa, ny vynna goslowes orta. 26Mes an myghtern a worhemmynnis dhe Yerahmeel mab an myghtern ha Seraya mab Azriel, ha Shelemia mab Abdeel may dhalghenna Baruk an skrifennyas ha Yeremia an profoes. Mes an Arloedh a's kelas.

Yeremia a Skrif Ken Rol-skrifa

27Ena ger an Arloedh a dheuth dhe Yeremia, wosa an myghtern dhe leski an rol-skrifa ha'n geryow a skrifas Baruk a-dhiworth ganow Yeremia, ow leverel: 28Kemmer ken rol-skrifa ha skrif warnedhi oll an geryow kyns esa y'n kynsa rol-skrifa a loskas Yehoyakim myghtern Yuda. 29Hag a-dro dhe Yehoyakim myghtern Yuda ty a lever: Yndellma y lever an Arloedh, Ty re loskas an rol-skrifa ma, ow leverel, Prag y skrifsys ynni y teu myghtern Babylon yn sur ha distrui an tir ma ha gul dhe hedhi anodho den ha best? 30Ytho yndellma y lever an Arloedh a-dro dhe Yehoyakim myghtern Yuda: Ny'n jevydh denvyth dhe esedha war dron Davydh, ha'y gorf marow a vydh tewlys yn-mes dhe'n toemmder dydhweyth ha dhe'n rew nosweyth. 31My a'n kessydh ha'y has ha'y servysi rag aga anewnder; my a dhre warnedha, ha war annedhysi Yerusalem, ha war bobel Yuda, oll an drog re leveris er aga fynn, mes ny woslowsons.

32Ena Yeremia a gemmeras ken rol-skrifa ha'y ri dhe Baruk an skrifennyas, mab Neria, neb a skrifas warnedhi a-dhiworth ganow Yeremia oll geryow an rol-skrifa re losksa Yehoyakim myghtern Yuda y'n tan; ha lies ger kehaval a veu keworrys dhedha.