Koedh Yerusalem

1Y'n nawves blydhen a Sedekia myghtern Yuda, y'n degves mis, y teuth Nebukadnessar myghtern Babylon hag oll y lu ha gul esedhva warnedhi; 2y'n unnegves blydhen a Sedekia, y'n peswora mis, yn nawves dydh an mis, aswa a veu terrys yn fos y'n sita. 3Ena oll pennsevigyon myghtern Babylon a dheuth a-ji, hag esedha y'n yet kres, hwath Nergal-sareser, Samgar-nebo, Sarsekim an Rabsaris, Nergal-sareser an Rabmag, hag oll an bennsevigyon arall a vyghtern Babylon. 4Ha pan y's gwelas Sedekia myghtern Yuda hag oll an soudoryon, i a fias, ha mos yn-mes a'n sita y'n nos, dre fordh lowarth an myghtern, der an yet ynter an dhiw fos; hag ev eth war-tu ha'n Araba. 5Mes lu an Kaldeanys a's pursiwyas, ha tremena dres Sedekia yn plenys Yeriko; ha pan y'n kemmersons, i a'n dros dhe Nebukadnessar myghtern Babylon, dhe Ribla, yn pow Hamath; hag ev a ros breus warnodho 6Ena myghtern Babylon a ladhas mebyon Sedekia a-rag y dhewlagas; ynwedh myghtern Babylon a ladhas oll pennsevigyon Yuda. 7Ena ev a dhallhas dewlagas Sedekia ha'y gelmi gans kadonyow, dh'y gemmeres dhe Babylon. 8An Kaldeanys a loskas chi an myghtern ha chiow an bobel gans tan, hag i a dorras fosow Yerusalem. 9Ena Nebuzaradan kapten an withysi a dhug yn divroedh dhe Babylon remenant an bobel o gesys y'n sita, ha'n re a gilfias dhodho, ha remenant an bobel re beu gesys. 10Mes Nebuzaradan kapten an withysi a asas boghosogyon an bobel, na's tevo travyth, yn pow Yuda, ha ri dhedha gwinlannow ha parkow y'n keth prys.

Yeremia, Livrys, a Berth Kov a Ebed-melek

11Lemmyn Nebukadnessar myghtern Babylon a ros gorhemmynn a-dro dhe Yeremia dhe Nebuzaradan kapten an withysi, ow leverel, 12Kemmer ev ha'y dhyghtya yn ta, ha na wra dregynn dhodho; mes gwra ganso par dell wovynn orthis. 13Ytho Nebuzaradan kapten an withysi a dhannvonas, ha Nebushazban an Rabsaris,39:13 Ytho Nebuzaradan kapten an withysi a dhannvonas, ha Nebushazban an Rabsaris: Po amendyans Ytho Nebuzaradan kapten an withysi a dhannvonas Nebushazban an Rabsaris. Nergal-sareser an Rabmag, hag oll pennsevigyon myghtern Babylon, 14hag i a dhannvonas dhe gemmeres Yeremia yn-mes a glos an prison, ha'y ri yn charj Gedalia mab Ahikam mab Shafan dhe vos degys dhe dre. Ytho ev a drigas yn mysk y bobel.

15Lemmyn ger an Arloedh a dheuth dhe Yeremia pan veu deges yn klos an prison, ow leverel: 16Ke ha kewsel dhe Ebed-melek an Ethiopek, ow leverel, Yndellma y lever Arloedh an luyow, Duw Ysrael: Otta, my a dhre ow ger war an sita ma rag drog, a-der rag da, hag i a vydh kollenwys a-ragowgh y'n jydh na. 17Mes my a'th saw y'n jydh na, yn-medh an Arloedh, ha ny vydhydh res yn leuv an wer a berthydh own anedha. 18Rag my a'th telirv yn sur, ha ny goedhydh der an kledha, mes dha vewnans a vydh preydh dhis, drefenn ty dhe fydhya ynnov, yn-medh an Arloedh.