1Mar tehwelydh, A Ysrael,

yn-medh an Arloedh,

mar tehwelydh dhymm:

ha mar korrydh dha daklow kasadow yn-mes a'm golok,

heb mos yn sowdhan na fella,

2ha mar tedh ‘Dell vew an Arloedh!’

yn gwirder, yn breus, hag yn ewnder,

ena an kenedhlow a omvennik ynno,

ha bostya ynno.

3Rag yndellma y lever an Arloedh dhe wer Yuda ha Yerusalem:

Gonedhewgh agas tir anerys,

ha na hesewgh yn mysk an spern.

4Omdrodreghewgh dhe'n Arloedh

ha kemmerewgh dhe-ves kudhgenn agas kolonn,

hwi wer Yuda ha trigoryon Yerusalem,

ma nag ello ow honnar yn-mes avel tan,

ha leski, heb denvyth dh'y dhifeudhi,

drefenn drogedh agas gwriansow.

Terroes a'n Gogledh

5Derivewgh yn Yuda, ha deklaryewgh yn Yerusalem, ha leverel:

Hwythewgh an hirgorn y'n tir;

kriewgh yn ughel ha leverewgh,

‘Omguntellewgh, hag entryn

y'n sitys kerys!’

6Drehevewgh baner war-tu ha Sion:

hwilewgh sawder, na wortewgh:

rag my a dhre droktra a'n gogledh,

ha distruyans meur.

7An lew yw devedhys yn-bann a-dhiworth y brysk,

hag yma distruer an kenedhlow war y fordh:

ev yw gyllys yn-rag a-dhiworth y dyller

dhe wul dha dir ynyal;

ha dha sitys a vydh gwastys,

heb annedhyas.

8Rakhenna omwrogysewgh gans yskar,

kynewgh hag oulyewgh:

‘Ny dreylyas ahanan

sorr fers an Arloedh.’

9Hag y hwyrvydh y'n jydh na, yn-medh an Arloedh, kolonn an myghtern na dhe goll, ha kolonn an bennternedh; krena a wra an oferysi, ha dyegrys vydh an brofoesi. 10Ena my a leveris, ‘Ogh A Arloedh Duw! Yn sur ty re doellas an bobel ma ha Yerusalem, ow leverel, “Kres a'gas bydh”; mes seulabrys an kledha a dhrehedh bys y'n enev.’4:10 enev: Po vryansenn.

11Y'n termyn na y fydh leverys dhe'n bobel ma ha dhe Yerusalem: Gwyns toemm a'n ugheldiryow moel y'n gwylvos war-tu ha myrgh ow fobel, mes ny vydh dhe groedra, na dhe lanhe; 12gwyns leun a'n tylleryow na a wra dos dhe'm arghadow:4:12 dhe'm arghadow: Ebrow dhymm. lemmyn ynwedh yth esov ow ri breus er aga fynn.

13Otta, ev a yskynn avel kommol,

ha'y jarettow a vydh avel korwyns:

y vergh yw uskissa ages eryon.

Go-ni! rag diswrys on ni.

14A Yerusalem, golgh dha golonn a-dhiworth drogedh,

may fi selwys.

Pes termyn y hwra dha brederow koeg

godriga genes?

15Rag lev a dhiskler a-dhiworth Dan,

ha dyllo galar a-dhiworth menydh Efraym.

16Menegewgh dhe'n kenedhlow, ‘Ottava’;

dyllewgh erbynn Yerusalem,

‘Yma eskerens4:16 eskerens: Ow siwya an Septuagint. Ebrow goelyadoryon. ow tos a bow pell,

hag i a lev erbynn sitys Yuda.

17Avel gwithysi park, ymons i a-dro dhedhi;

drefenn i dhe vos diwostydh er ow fynn,

yn-medh an Arloedh.

18Dha fordh ha'th wriansow

re dhros an traow ma warnas:

hemm yw dha dhrogedh,4:18 dhrogedh: Po gessydhyans. ass yw hwerow!

re dhrehedhas bys y'th kolonn.’

Ahwer rag Kenedhel Vreusys

19Ow holodhyon, ow holodhyon! my a omwen yn payn,

fosow ow holonn a lamm;

ow holonn a wra tros ynnov;

ny allav tewel;

rag my re glewas son an hirgorn,

ow enev re glewas an tros a vresel.4:19 ow enev re glewas an tros a vresel: Ebrow ow enev tros bresel.

20Distruyans a siw distruyans;

rag oll an tir yw diswrys:

distowgh ow thyldow yw diswrys,

ha'm kroglennow yn hwers.

21Pes termyn y hwelav an baner,

ha klewes son an hirgorn?

22‘Rag ow fobel yw foll,

ny'm aswonnsons;

fleghes wokki yns,

ny's teves konvedhes:

konnyk yns dhe wul drogober,

mes dhe wul da ny's teves skentoleth.’

23My a viras war an nor, hag, otta heb furv o, ha gwag;

ha war an nevow ha ny's tevo golow.

24My a viras war an menydhyow, hag, otta yth esens ow krena,

hag yth esa an breow oll kryghyllys.

25My a viras, hag otta nyns esa den,

hag oll ydhyn an nevow re fisa.

26My a viras, hag otta an tir feyth o gwylvos,

hag oll y sitys o terrys

a-rag an Arloedh, hag a-rag y sorr fers.

27Rag yndella an Arloedh re leveris: An tir oll a vydh ynyal; mes hwath ny wrav vy kowldhistrui.

28Drefenn henna an nor a wra kyni,

ha'n nevow a-ugh a vydh du:

rag my re'n leveris, my re'n mynnas,

ha ny'm bydh edrek, na ny gildennav a-dhiworto.

29An sita oll a wra fia

rag tros an varghogyon ha'n sethoryon;

i a wra mos y'n kaswydh, hag yskynna war an kerrek:

pub sita a vydh eskesys,

ha ny wra triga denvyth ynna

30Ha ty, gwastys, pandr'a wredh,

owth omwiska yn kogh,

owth omdakla gans tegennow owrek,

ow liwa dha dhewlagas gans antimoni,

yn euver yth omwredh teg;

dha garoryon a'th tispres,

i a hwila dha vewnans.

31Rag my re glewas lev avel benyn yn lavur,

ha'n gloesow avelli hi neb a dhineyth hy hynsa flogh,

lev myrgh Sion, ow tyena rag anall,

ow lesa hy diwleuv,

‘Go-vy! Klamdera a wrav drefenn ladhoryon.’