Yeremia gans Gedalia

1An ger hag a dheuth dhe Yeremia a-dhiworth an Arloedh wosa Nebuzaradan kapten an withysi y asa dhe vos a-dhiworth Rama, pan y'n kemmeras yn kadonyow gans oll kethyon Yerusalem ha Yuda esa ow pos divres dhe Babylon. 2Kapten an withysi a gemmeras Yeremia ha leverel dhodho, ‘An Arloedh dha Dhuw re dharganas an drog ma war an tyller ma; 3ha lemmyn an Arloedh a'n dros, ha gul war-lergh an pyth a leveris, drefenn hwi dhe begha erbynn an Arloedh ha ny woslewsowgh y lev. Rakhenna an dra ma yw devedhys warnowgh. 4Lemmyn mir, my re'th rydhhas hedhyw a'n kadonyow war dha dhiwleuv. Mars yw da genes dos genev dhe Babylon, deus, ha my a'th with yn ta; mes mar nyns yw da genes dos genev dhe Babylon, ny dal dhis dos. Mir, yma oll an tir a-ragos; plepynag a hevel dhis bos da hag ewn, ke di. 5Mar kortydh, ena dehwel dhe Gedalia mab Ahikam mab Shafan, a veu gwrys governour trevow Yuda gans myghtern Babylon, ha gorta ganso yn mysk an bobel; po ke plepynag yth hevel ewn dhe vos di.’ Ytho kapten an withysi a ros dhodho ewnrann a voes ha ro, ha'y asa dhe vos. 6Ena Yeremia eth dhe Gedalia mab Ahikam, dhe Mispa, ha gortos ganso yn mysk an bobel o gesys y'n tir.

7Pan glewas oll pennsevigyon an luyow, esa y'n gwel, i ha'ga gwer, myghtern Babylon dhe wul Gedalia mab Ahikam governour an tir ha ri yn y jarj gwer, gwragedh ha fleghes, boghosogyon an tir na veu kemmerys yn kethneth dhe Babylon, 8i a dheuth dhe Gedalia, dhe Mispa, Yshmael mab Nethania, Yohanan mab Kareagh, Seraya mab Tanhumeth, mebyon Efay an Netofathyas, Yezania mab an Maakathyas, i ha'ga gwer. 9Ha Gedalia mab Ahikam mab Shafan a dos dhedha ha dh'aga gwer, ow leverel, ‘Na vedhewgh ownek dhe servya an Kaldeanys. Gortewgh y'n tir ha servya myghtern Babylon, hag y fydh da genowgh. 10Ha my, otta, my a drig yn Mispa dhe servya an Kaldeanys a dheu dhyn; mes hwi, kuntellewgh gwin, ha frutys hav, hag oyl, ha'ga gorra yn agas lestri, ha trigewgh yn agas sitys re gemmersowgh.’ 11Keffrys pan glewas an Yedhewon esa yn Moab hag yn mysk an Ammonysi hag yn Edom hag yn oll an powyow, myghtern Babylon dhe asa remenant yn Yuda ha settya warnedha Gedalia mab Ahikam mab Shafan, 12ena oll an Yedhewon a dhehwelis dhiworth oll an tylleryow le may fons skattrys, ha dos dhe bow Yuda, dhe Gedalia, dhe Mispa; hag i a guntellas gwin ha frutys hav yn palster.

Bras Yshmael erbynn Gedalia

13Lemmyn Yohanan mab Kareagh hag oll pennsevigyon an luyow y'n gwel a dheuth dhe Gedalia, dhe Mispa, 14ha leverel dhodho, ‘A wodhes Baalis myghtern an Ammonysi dhe dhannvon Yshmael mab Nethania dhe'th ladha?’ Mes ny's krysis Gedalia mab Ahikam. 15Ena Yohanan mab Kareagh a gewsis dhe Gedalia yn Mispa yn-dann gel, ow leverel, ‘Gas vy dhe vos, my a'th pys, ha my a ladh Yshmael mab Nethania, ha ny wodhvydh denvyth. Prag y'th ledhydh may fydh skattrys oll an Yedhewon yw kuntellys a-dro dhis, ha remenant Yuda a verow?’ 16Mes Gedalia mab Ahikam a leveris dhe Yohanan mab Kareagh, ‘Ny wredh tra a'n par ma, rag ty a wowlever a-dro dhe Yshmael.’