Omsav erbynn Gedalia

1Y'n seythves mis, Yshmael mab Nethania mab Elishama, a'n teylu ryel, onan a bennsevigyon an myghtern, a dheuth ha deg gwer ganso dhe Gedalia mab Ahikam, dhe Mispa, hag ena i a dhybris bara war-barth yn Mispa. 2Yshmael mab Nethania, ha'n deg gwer esa ganso, a sevis ha gweskel Gedalia mab Ahikam mab Shefan gans an kledha ha'y ladha, ev neb a veu gwrys governour an tir gans myghtern Babylon. 3Yshmael a ladhas oll an Yedhewon esa gans Gedalia yn Mispa ynwedh, ha soudoryon an Kaldeanys esa ena.

4Hag y'n jydh wosa ev dhe ladha Gedalia, kyns denvyth dh'y wodhvos, 5gwer a dheuth a-dhiworth Shekem ha Shilo ha Samaria, ha'ga barvow treghys ha'ga dillas fregys, ha'ga horf treghys, gans offrynnow greun ha frankynkys yn aga leuv, dh'aga dri dhe ji an Arloedh. 6Hag Yshmael mab Nethania eth yn-mes a-dhiworth Mispa dh'aga metya, owth oela hag ev ow tos. Pan vetyas gansa ev a leveris dhedha, ‘Dewgh dhe Gedalia mab Ahikam.’ 7Pan dhrehedhsons dhe gres an sita, Yshmael mab Nethania ha'n wer ganso a's ladhas, ha'ga thewlel yn dowrargh. 8Mes yth esa deg gwer kevys yn aga mysk neb a leveris dhe Yshmael, ‘Na'gan ladh, rag ni a'gan beus y'n parkow tresoryow kudhys a waneth, heydh, oyl ha mel.’ Ytho ev a hedhis, ha ny's ladhas war-barth gans aga breder.

9Lemmyn an dowrargh le may tewlis Yshmael korfow an wer re ladhas drefenn Gedalia o an dowrargh gwrys gans Asa an myghtern rag own Baasha myghtern Ysrael; Yshmael mab Nethania a'n lenwis gans an re ledhys. 10Ena Yshmael a dhug yn-mes yn kethneth remenant oll an bobel esa yn Mispa, hwath myrghes an myghtern, neb a ros Nebuzaradan kapten an withysi yn charj Gedalia mab Ahikam. Yshmael mab Nethania a's kemmeras dhe-ves yn kethneth hag omdenna rag treusi dhe'n Ammonysi.

11Mes pan glewas Yohanan mab Kareagh, hag oll pennsevigyon an luyow esa ganso, a oll an drog a veu gwrys gans Yshmael mab Nethania, 12i a gemmeras oll aga gwer ha mos dhe omladh erbynn Yshmael mab Nethania. I a'n kavas ryb an poll meur usi yn Gibeon. 13Ha pan welas oll an bobel esa gans Yshmael Yohanan mab Kareagh hag oll an bennsevigyon esa ganso, lowen ens. 14Ytho oll an bobel a wrussa Yshmael aga hemmeres dhe-ves yn kethneth a-dhiworth Mispa a dreylyas a-dro ha dehweles, ha mos dhe Yohanan mab Kareagh. 15Mes Yshmael mab Nethania a dhienkas a-dhiworth Yohanan gans eth gour, ha mos dhe'n Ammonysi. 16Ena Yohanan mab Kareagh hag oll pennsevigyon an luyow esa ganso a gemmeras remenant an bobel a veu kemmerys yn kethneth gans Yshmael mab Nethania a-dhiworth Mispa wosa ev dhe ladha Gedalia mab Ahikam, soudoryon, benynes, fleghes ha spadhesigyon, neb a wrug Yonathan aga dri a-dhiworth Gibeon. 17Hag i eth yn-kerdh, ha gortos yn Geruth Kimham ogas dhe Bethlehem, ow mynnes mos dhe Ejyp 18drefenn an Kaldeanys; rag own a's tevo anedha, drefenn Yshmael mab Nethania dhe ladha Gedalia mab Ahikam, neb a veu gwrys governour y'n tir gans myghtern Babylon.