Kusul Yeremia dhe Yohanan

1Ena oll pennsevigyon an luyow, ha Yohanan mab Kareagh ha Yezania42:1 Yezania: Ow siwya an Ebrow. Yn Yer 43:2 an hanow yw Azaria. War-lergh an Septuagint an hanow yw Azaria omma ynwedh. mab Hoshaia, hag oll an bobel a'n lyha dhe'n meurra a dheuth nes 2ha leverel dhe Yeremia an profoes, ‘Gas, ni a'th pys, agan pledyans dhe vos degemmerys a-ragos, ha pys dhe'n Arloedh a'gan govis, rag oll an remenant ma (rag ni yw gesys marnas boghes a'n lies, dell wel dha dhewlagas) 3may hwrello an Arloedh dha Dhuw diskwedhes dhyn an fordh may kerdhyn ynni ha'n pyth a wren.’ 4Ena Yeremia an profoes a leveris dhedha, ‘My re'gas klewas: my a bys dhe'n Arloedh agas Duw war-lergh agas geryow, ha pypynag a worthyp an Arloedh my a lever dhywgh; ny withav travyth ahanowgh.’ 5Ena i a leveris dhe Yeremia, ‘Re bo an Arloedh gwir dhustunier ha len er agan pynn mar ny wren war-lergh pup-tra a dhannvon dhyn an Arloedh dha Dhuw dredhos. 6Mars yw da po drog, ni a vydh gostydh dhe lev an Arloedh agan Duw dhe neb y'th tannvenyn may fo da genen pan vydhyn gostydh dhe lev an Arloedh agan Duw.’

7Dhe benn deg dydh y teuth ger an Arloedh dhe Yeremia. 8Ena ev a elwis Yohanan mab Kareagh hag oll pennsevigyon an luyow esa ganso, hag oll an bobel a'n lyha dhe'n meurra, 9ha leverel dhedha, ‘Yndellma y lever an Arloedh, Duw Ysrael, dhe neb y'm dannvonsowgh dhe worra agas pledyans a-ragdho: 10Mar trigowgh y'n tir ma, ena my a'gas drehav, a-der agas tenna dhe'n leur; my a'gas plans ha ny'gas diwreydhyav; rag edrek a'm beus a'n anfeusi a wrug dhywgh. 11Na berthewgh own a vyghtern Babylon, may perthowgh own anodho; na berthewgh own anodho, yn-medh an Arloedh, rag my a vydh genowgh, dh'agas sawya ha'gas livra a'y leuv. 12Ha my a dhiskwedh truedh dhywgh may kemmerro truedh ahanowgh ha'gas gasa dhe triga yn agas tir agas honan. 13Mes mar leverowgh, “Ny vynnyn triga y'n tir ma”, ow pos diwostydh dhe lev an Arloedh agas Duw 14ow leverel, “Na, mes ni a vynn mos yn pow Ejyp, le ma na welyn bresel, na klewes son an hirgorn, na bos nownek rag bara, hag ena y trigyn”, 15ena klewewgh ger an Arloedh hwi remenant Yuda. Yndellma y lever Arloedh an luyow, Duw Ysrael: Mars owgh hwi ervirys dhe vos dhe Ejyp ha dhe driga ena, 16ena an kledha may perthowgh own anodho a wra agas pursiwya bys yn pow Ejyp; ha'n divoetter esowgh ow perthi own anodho a wra agas pursiwya bys yn Ejyp; hag ena hwi a verow. 17Oll an bobel ervirys dhe vos dhe Ejyp dhe driga ena a verow gans an kledha, gans an divoetter ha gans an pla; ny vydh nagonan anedha gesys, na ny dhiank a-dhiworth an drog a dhrov warnedha.

18‘Rag yndellma y lever Arloedh an luyow, Duw Ysrael: Par dell veu diverys ow sorr hag ow honnar war annedhysi Yerusalem, yndellma ow honnar a vydh diverys warnowgh pan ewgh dhe Ejyp. Hwi a vydh molleth, hag euth, ha milliga ha keredh. Ny welowgh an tyller ma namoy. 19An Arloedh re leveris dhywgh, hwi remenant Yuda, Nag ewgh dhe Ejyp. Godhvydhewgh my dh'agas gwarnya hedhyw 20hwi dhe vos yn sowdhan yn agas kolonn. Rag hwi agas honan a'm dannvonas dhe'n Arloedh agas Duw, ow leverel, “Pys a'gan govis dhe'n Arloedh agan Duw, ha war-lergh an pyth a lever an Arloedh agan Duw, lavar dhyn, ha ni a'n gwra.” 21Ha lemmyn my re gewsis dhywgh hedhyw, mes ny vewgh gostydh dhe lev an Arloedh agas Duw yn travyth ma'm dannvonas dh'y leverel dhywgh. 22Godhvydhewgh ytho yn ta, hwi a verow gans an kledha, gans an divoetter ha gans an pla y'n tyller may fynnowgh mos ha triga.’