Yeremia kemmerys dhe Ejyp

1Pan worfennas Yeremia kewsel dhe oll an bobel oll geryow an Arloedh aga Duw, ha gansa may hwrug an Arloedh aga Duw y dhannvon dhedha, 2Azaria mab Hoshaia ha Yohanan mab Kareagh hag oll an wer valgh a leveris dhe Yeremia, ‘Ty a wowlever. Ny'th tannvonas an Arloedh agan Duw dhe leverel, “Nag ewgh dhe Ejyp dhe driga ena”; 3mes yma Baruk mab Neria orth dha ynnia er agan pynn, dh'agan ri yn leuv an Kaldeanys, ma'gan gorrens dhe'n mernans, ha'gan kemmeres dhe-ves yn divroedh dhe Babylon.’ 4Ytho ny veu Yohanan mab Kareagh hag oll pennsevigyon an luyow hag oll an bobel gostydh dhe lev an Arloedh, dhe driga yn pow Yuda. 5Mes Yohanan mab Kareagh hag oll pennsevigyon an luyow a gemmeras oll remenant Yuda re dhehwelsa dhe driga yn pow Yuda dhiworth an kenedhlow oll may fiens herdhys dhedha – 6an wer, ha'n benynes, ha'n fleghes, ha myrghes an myghtern, ha pubonan a wrug Nebuzadan kapten an withysi gasa gans Gedalia mab Ahikam mab Shafan; ynwedh Yeremia an profoes ha Baruk mab Neria. 7Hag i a dheuth bys yn pow Ejyp, rag ny woslowsons orth lev an Arloedh. Hag i a dheuth dhe Tahpanhes.

8Ena ger an Arloedh a dheuth dhe Yeremia yn Tahpanhes: 9Kemmer y'th leuv meyn bras, ha'ga ynkleudhyas y'n leur a bri usi orth daras chi Faro yn Tahpanhes, yn golok gwer Yuda, 10ha lavar dhedha, Yndellma y lever Arloedh an luyow, Duw Ysrael: Otta, my a dhannvon ha kemmeres Nebukadnessar myghtern Babylon, ow gwas, hag ev a worr y dron a-ugh an meyn ma re ynkleudhis, hag ev a les y babell ryel warnedha. 11Ev a dheu ha gweskel pow Ejyp, ow ri dhe'n mernans an re yw destnys rag mernans, ha dhe gethneth an re yw destnys rag kethneth, ha dhe'n kledha an re yw destnys rag an kledha. 12Ev a dhew tan yn chiow duwow Ejyp. Ev a's lesk, ha'ga doen dhe-ves yn kethneth, hag ev a lanha pow Ejyp, par dell lanha bugel y dhillas; hag ev a omdenn alena yn kres. 13Ev a derr peulveyn Tempel an Howl, usi yn pow Ejyp; ha templow duwow Ejyp ev a lesk gans tan.