Messaj a-dro dhe Ejyp

1Ger an Arloedh hag a dheuth dhe Yeremia an profoes a-dro dhe'n kenedhlow.

2A-dro dhe Ejyp, a-dro dhe lu Faro Neko, myghtern Ejyp, esa ryb an avon Ewfrates yn Karkemish hag a veu fethys gans Nebukadnessar myghtern Babylon y'n peswora blydhen a Yehoyakim mab Yosia myghtern Yuda:

3Pareusewgh bokler ha skoes

ha dewgh nes dhe'n vatel!

4Hernessyewgh an vergh;

yskynnewgh, marghogyon!

Kemmerewgh agas savleow gans agas basnettow,

gwrewgh dh'agas lonsow lentri,

gwiskewgh agas kaspowsyow.

5Prag y's gwelis dyegrys

ha treylys war-dhelergh?

Aga breselyoryon yw gweskys,

ha re fias yn fisten,

heb mires war-dhelergh;

yma euth a bub tu,

yn-medh an Arloedh.

6Na wres an buan fia

na'n kasor diank;

dhe'n gogledh ryb an avon Ewfrates

i re drebuchyas ha koedha.

7Piw yw hemma, usi ow sevel avel an Nil,

avel avonyow gans aga dowrow yn hwythfians?

8Ejyp a sev avel an Nil,

avel avonyow gans aga dowrow yn hwythfians.

Ev a leveris, My a sev, my a gudh an nor,

my a dhistru an sitys ha'ga annedhysi.

9Yn-rag, hwi vergh,

ha fyski yn fuskok, hwi jarettow!

Gas an vreselyoryon dhe vos yn-rag:

gwer Ethiopia ha Put hag a dheg an skoes,

gwer Lud hag a denn an warak.

10Rag hemm yw dydh an Arloedh, Duw an luyow,

dydh a dhial,

dhe dyli dial war y eskerens.

An kledha a dhevor hag a vydh gwalghys,

ha medhwys gans aga goes.

Rag an Arloedh, Duw an luyow, a'n jeves sakrifis

yn tir an gogledh ryb an avon Ewfrates.

11Ke yn-bann dhe Gilead ha kemmer balsam,

A wyrghes, vyrgh Ejyp!

Yn euver ty a wra devnydh a'th vedhegnethow;

ny'gas beus yaghheans.

12An kenedhlow re glewas a'th veth,

ha'th kri re lenwis an nor;

rag kasor re drebuchyas erbynn kasor;

ha'n dhew re goedhas war-barth.

13An ger a gewsis an Arloedh dhe Yeremia an profoes a-dro dhe dhevedhyans Nebukadnessar myghtern Babylon dhe weskel pow Ejyp:

14Diskleryewgh yn Ejyp, ha gwarnya yn Migdol;

gwarnyewgh yn Nof hag yn Tahpanhes;

leverewgh, ‘Kemmer dha savla, ha bydh parys,

rag an kledha a dhevor an re a-dro dhis.’

15Prag yth yw Apis46:15 Apis: Ow siwya an Septuagint. Ebrow dha re grev, henn yw, dha soudoryon. prosternys?

Prag na wrug dha darow sevel fast?

– drefenn an Arloedh dh'y herdhya dhe-ves.

16Dha lu a drebuchyas46:16 Dha lu a drebuchyas: Amendys. Ebrow Ev a lieshas an den a drebuch. ha koedha,

ha leverel an eyl dh'y gila,

‘Dewgh, dehwelyn dh'agan pobel agan honan

ha dhe dir agan genesigva,

drefenn kledha an arwasker.’

17Gelwewgh hanow Faro myghtern Ejyp,

‘Braggyer neb a gollas y jons.’

18Dell vewav, yn-medh an Myghtern,

ha'y hanow Arloedh an luyow,

nebonan a dheu

kepar ha Tabor y'n menydhyow,

ha kepar ha Karmel ryb an mor.

19Pareus ragos fardellow divroedh,

ty annedhyas, myrgh Ejyp!

Rag Nof a vydh gwastys

hag y fydh distruys, heb annedhyas.

20Denewes pur deg yw Ejyp

mes yma kelyon margh ow tos er hy fynn a'n gogledh

21Ynwedh hy gwer arvethys yn hy kres

yw avel leughi peskys;

rag i ynwedh re dreylyas ha fia war-barth,

ny sevsons;

rag dydh aga therroes re dheuth warnedha,

ha termyn aga hessydhyans.

22Ejyp a wra son kepar ha sarf ow slynkya dhe-ves;

rag hy eskar a geskerdh gans lu,46:22 Ejyp a wra son kepar ha sarf ow slynkya dhe-ves; rag hy eskar a geskerdh gans lu: Ebrow Hy son yw avel sarf ow mos, rag i a gerdh yn lu.

ha dos er hy fynn gans boelyow,

avel an re a dregh gwydh.

23I a derr hy hoeswik,

yn-medh an Arloedh,

kynth yw re dew dhe hwithra,

drefenn aga bos moy niverus ages an lokustes,

heb nivera yns i.

24Myrgh Ejyp a vydh gorrys dhe veth;

hi a vydh livrys yn leuv pobel an gogledh.

25Arloedh an luyow, Duw Ysrael, a leveris: Otta, my a dhre kessydhyans war Amon a Thebes, ha Faro, hag Ejyp, ha'ga duwow ha'ga myghternedh, war Faro ha'n re a fydh ynno. 26My a's liver yn leuv an re a hwila aga bewnans, dhe Nebukadnessar myghtern Babylon ha'y wesyon. A-wosa Ejyp a vydh annedhys avel y'n dydhyow koth, yn-medh an Arloedh.

Duw a Saw Ysrael

27Mes ty, na vydh ownek, ow gwas Yakob,

ha na vydh digolonnek, A Ysrael;

rag my a'th saw a-bell,

ha'th has a-dhiworth tir aga hethneth.

Yakob a dhehwel ha bos yn powes hag attes,

ha nagonan ny worr own ynno.

28Ha ty, na vydh ownek, ow gwas Yakob,

yn-medh an Arloedh,

rag yth esov genes.

My a wra diwedh dhe oll an kenedhlow

le ma'th skattris,

mes ny wrav dha leun dhistrui.

My a'th kessydh yn ewn musur,

mes ny wrav dha asa heb kessydhyans yn tien.