Breus war an Ammonysi

1A-dro dhe'n Ammonysi.

Yndellma y lever an Arloedh:

A nyns eus mebyon dhe Ysrael?

A nyns eus her dhodho?

Prag ytho yth eritas Milkom Gad

ha'y bobel re annedhis yn y sitys?

2Rakhenna otta, an dydhyow a dheu,

yn-medh an Arloedh,

pan wrav an arm a vatel dhe vos klewys

erbynn Rabba a'n Ammonysi;

y fydh krug difeyth,

ha'y threvow a vydh leskys gans tan;

ena Ysrael a dhiserit an re a wrug y dhiserita ev,

yn-medh an Arloedh.

3Oul, A Heshbon, rag Ay yw gwastys!

Kriewgh, A vyrghes Rabba,

Omwrogysewgh gans yskar,

galarewgh, ha poenyewgh omma hag ena ryb an keow.

Rag Milkom a yn divroedh,

war-barth gans y oferysi ha'y bennsevigyon.

4Prag y fostydh y'th nerth49:4 nerth: Amendys. Ebrow nansow.?

Dha nerth a deudh dhe-ves,

A vyrgh dhislen.

Ty a fydhyas y'th tresoryow, ow leverel,

‘Piw a dheu er ow fynn?’

5Otta, my a dhre euth warnas,

yn-medh an Arloedh, Duw an luyow,

a-dhiworth oll dha gentrevogyon;

ha hwi a vydh skattrys, sket,

heb denvyth dhe guntell an fowesigyon.

6Hag a-wosa my a dreyl kethneth an Ammonysi, yn-medh an Arloedh.

Barn war Edom

7A-dro dhe Edom.

Yndellma y lever an Arloedh:

A nyns eus furneth na fella yn Teman?

Yw kusul an dhoethyon gyllys dhe goll?

Yw pedrys aga furneth?

8Fiewgh, treylyewgh agas keyn, trigewgh isel,

annedhysi Dedan!

Rag my a dhre terroes Esaw warnodho,

pan y'n kessydhyav.

9Mar teffa dhis kuntelloryon grappys,

a ny assens rann?

Mar teffa ladron y'n nos,

a ny byllsens unnsel an pyth a ve lowr ragdha?

10Mes my, my re dhestryppyas Esaw,

my re dhiskudhas y dylleryow kudh,

ha ny yll omgudha.

Y has yw distruys, y neskerens

ha'y gentrevogyon; nyns usi namoy.

11Gas dha omdhivasow, my a's gwith yn few;

ha gas dha wedhwesow dhe fydhya ynnov.

12Rag yndellma y lever an Arloedh: Otta, seul na veu breusys dhe eva an hanaf a dal hwath y eva, ytho a vydhydh ty heb kessydhyans vyth? Ny vydhydh heb kessydhyans; res yw dhis y eva. 13Rag my re dos re'm honan, yn-medh an Arloedh, y fydh Bosra euth ha skorn ha difeyth ha molleth; ha'y sitys oll a vydh magoryow bys vykken.

14My re glewas nowodhow dhiworth an Arloedh,

ha kannas re beu dannvenys yn mysk an kenedhlow:

‘Omguntellewgh war-barth ha dewgh er hy fynn,

ha sevewgh dhe'n vatel!’

15Rag otta, my a'th wra an lyha yn mysk an kenedhlow,

ha dispresys gans densys.

16An browagh gwrys genes

ha goeth dha golonn re's toellas,

ty usi trigys yn folsyow an garrek,

neb a syns ughelder an vre.

Kyn hwredh dha neyth mar ughel ages an er,

alena my a'th tre dhe'n leur,

yn-medh an Arloedh.

17Ynwedh Edom a vydh ynyal; peub a dremen dresti a gemmer skruth ha hwibana drefenn oll hy flagys. 18Par dell veu Sodom ha Gomorra ha'ga hentrevogyon domhwelys, yn-medh an Arloedh, ny vydh denvyth trigys ena, na ny vydh nagonan ynni avel alyon. 19Otta, avel lew ow tos a-dhiworth kaswydh an Yordan erbynn peurva a dhur der an vlydhen, a-dhesempis my a's49:19 a's: Ow siwya an Septuagint ha'n Syriek. Ebrow a'n chas yn-mes anedhi. Piw yw an den dewisys a apoyntyav rag hemma? Rag piw yw haval dhymm? Piw a yll ow gelwel dhe ri akont? Piw yw an bugel a yll sevel er ow fynn? 20Ytho klewewgh kusul an Arloedh erbynn Edom ha'y dowlow re formyas erbynn annedhysi Teman: Yn sur an lyha a'n flokk a vydh draylys dhe-ves; yn sur ev a wra aga feurva ynyal ragdha. 21Orth son aga hoedh, an nor a gren; son aga kri a vydh klewys orth an Mor Rudh. 22Otta, ev a yskynn ha nija avel an er ha lesa y dhiwaskell war Bosra, ha kolonn breselyoryon Edom y'n jydh na a vydh avel kolonn benyn yn hy gwelivesi.

Barn war Damaskus

23A-dro dhe Damaskus.

Hamath hag Arpad a's teves meth,

drefenn i dhe glewes yeyn nowodhow;

i a deudh yn own, troblys yns avel an mor

na yll bos kosel.

24Damaskus yw devedhys ha bos gwann, hi re dreylyas dhe fia,

ha skruth re's dalghennas,

angoes ha gloesow re's synsis,

avel benyn yn hy gwelivesi.

25Ass yw forsakys an sita a vri,

an dre lowenek!

26Rakhenna hy gwer yowynk a goedh yn hy stretow,

hag oll hy soudoryon a vydh distruys an jydh na,

yn-medh Arloedh an luyow.

27Ha my a enow tan orth fos Damaskus,

hag a gowllesk lysyow Ben-hadad.

Barn war Kedar ha Hasor

28A-dro dhe Kedar ha gwlaskordhow Hasor a wrug Nebukadnessar myghtern Babylon aga fetha.

Yndellma y lever an Arloedh:

Sevewgh, kewgh yn-bann erbynn Kedar,

ha distruewgh pobel an duryen.

29I a gemmer aga thyldow ha'ga flokkys,

aga kroglennow hag oll aga gwara;

i a gemmer aga hawrvergh dh'aga honan,

hag i a gri dhedha: ‘Yma euth a bub tu!’

30Fiewgh, gwandrewgh pell dhe-ves, trigewgh yn tylleryow down,

hwi annedhysi Hasor!

yn-medh an Arloedh.

Rag Nebukadnessar myghtern Babylon

re dewlis towl er agas pynn

ha gul entent er agas pynn.

31Sevewgh, kewgh yn-bann erbynn kenedhel attes,

eus trigys yn tiagha,

yn-medh an Arloedh,

na's teves yetow na barrys,

usi trigys hy honan.

32Aga hawrvergh a vydh preydh,

aga greow a warthek pyllans.

My a skatter dhe bub gwyns

an re a's teves talyow moel,

ha my a dhre terroes

er aga fynn a bub tu,

yn-medh an Arloedh.

33Hasor a vydh godegh owrgeun,

difeyth bys vykken;

ny vydh trigys denvyth ena,

na ny vydh nagonan ynni avel alyon.

Barn war Elam

34Ger an Arloedh a dheuth dhe Yeremia an profoes a-dro dhe Elam, yn dalleth reyn myghtern Sedekia myghtern Yuda.

35Yndellma y lever Arloedh an luyow: My a derr gwarak Elam, penn aga nerth; 36ha my a dhre war Elam an peswar gwyns a beswar korn nev; ha my a's skatter dhe oll an gwynsow ma, ha ny vydh kenedhel vyth dhedhi ma na dheu dhodho fowesigyon Elam. 37My a worr euth yn Elam a-rag aga eskerens, hag a-rag an re a hwila aga bewnans; my a dhre anfeusi warnedha, ow sorr fers, yn-medh an Arloedh. My a dhannvon an kledha war aga lergh, bys pan wrav diwedh dhedha; 38ha my a sett ow thron yn Elam, ha distrui aga myghtern ha'ga fennsevigyon, yn-medh an Arloedh.

39Mes y'n dydhyow diwettha my a dhre arta kethneth Elam, yn-medh an Arloedh.