Peghes Yerusalem

1Gwandrewgh a-dro dre stretow Yerusalem,

gwelewgh lemmyn, ha godhvydhewgh,

ha hwilewgh yn hy plenys,

mar kyllowgh kavoes gour,

mars eus nebonan a wra breus,

a hwila gwirder;

ha my a's gav.

2Kyn leverons, ‘Dell vew an Arloedh’,

yn sur i a de yn fals.

3A Arloedh, a nyns yw dha lagas war an gwirder?

ty re's gweskis

mes ny wodhevons payn;

ty re's diswrug,

mes i re naghas degemmeres dyskybleth:

i re wrug aga fasow kalessa ages karrek;

i re naghas dehweles.

4Ytho my a leveris, ‘Yn sur boghosek yw an re ma;

gokki yns:

rag ny wodhons fordh an Arloedh,

na breus aga Duw.

5My a wra mos dhe'n dus veur,

ha kewsel orta;

rag i re wodhva fordh an Arloedh,

ha breus aga Duw.’

Mes i keffrys re dorras an yew,

ha terri an rawyow.

6Rakhenna lew yn-mes a'n goeswik a's ladh,

ha bleydh a'n gwylvos a's diswra,

lewpard a wra goelyas war aga sitys:

pubonan neb a wra mos yn-mes alena a vydh skwardys dhe demmyn:

drefenn aga threuspassow yw lies,

ha'ga hildroyow yw moghhes.

7Fatell wrav vy gava hemma dhis?

Dha fleghes re'm eskasas,

ha ti re dhuwow nag yw duwow mann:

My a's magas dhe walgh,

i a wrug avoutri,

hag omguntell yn routhow dhe jiow5:7 hag omguntell yn routhow dhe jiow: Po war-lergh an Septuagint ha godriga yn chiow Styr an tekst ebrow yw ankler. horys.

8Avel mergh krev leunvegys ens y'n myttin:

peub ow kryghias war-lergh gwreg y gentrevek.

9A ny wrav aga hessydhya drefenn an traow ma?

yn-medh an Arloedh:

hag a ny vydh ow enev diellys

war genedhel a'n par ma?

10Kewgh yn-bann dre rewyow hy gwinbrennyer, ha distrui;

mes na wra diwedh leun:

tennewgh dhe-ves hy barrennow:

rag nyns yns i dhe'n Arloedh.

11Rag chi Ysrael ha chi Yuda

re beu fest traytus er ow fynn,

yn-medh an Arloedh.

12I re naghas an Arloedh,

ha leverel, ‘Ny wra ev travyth;

na ny wra drogedh dos warnan;

ny welyn ni naneyl kledha na divoetter.’

13An brofoesi a vydh avel gwyns;

ha nyns usi an ger ynna;

yndellma y fydh gwrys dhedha.

14Rakhenna yndellma y lever an Arloedh, Duw an luyow,

Drefenn hwi dhe gewsel an ger ma,

otta, my a wra ow geryow tan y'th ganow,

ha'n bobel ma prenn, ha'n tan a wra aga devorya.

15Otta, my a dhre warnowgh

kenedhel a bellder, A ji Ysrael,

yn-medh an Arloedh:

kenedhel yw neb a dhur,

kenedhel goth,

kenedhel anedhi na wodhes hy yeth,

na konvedhes an pyth a leverons.

16Aga goen-sethow yw avel bedh igor,

kasoryon alloesek yns pub huni.

17I a wra dybri dha drevas, ha'th vara,

a dalvia bos dybrys gans dha vebyon ha'th vyrghes:

i a wra dybri dha flokkys ha'th greow;

i a wra dybri dha winbrennyer ha'th figys;

i a wra terri dhe demmyn dha sitys kerys,

ynna may fydhsys, der an kledha.

18Mes hwath y'n dydhyow na, yn-medh an Arloedh, ny wrav diwedh leun genowgh. 19Hag y hwyrvydh, pan leverowgh, ‘Prag y hwra an Arloedh an traow ma dhyn?’ ena ty a worthyp dhedha, ‘Par dell wrussowgh ow eskasa, ha servya duwow estren yn agas tir, yndellma hwi a serv estrenyon yn tir nag eus dhywgh.’

20Diskleryewgh hemma yn chi Yakob,

ha'y dhyllo yn Yuda, ow leverel,

21Klewewgh hemma lemmyn, A bobel dhiboell, ha heb konvedhes;

neb a's teves lagasow ha ny welons;

neb a's teves skovornow, ha ny glewons.

22A ny berthowgh own ahanav? yn-medh an Arloedh:

a ny grenowgh a-ragov?

My re worras an tewes avel or dhe'n mor,

ordenans bys vykken, ma na yll y dremena:

an tonnow a sev yn trosek, mes ny's teves an galloes;

kyn tarennons, ny yllons tremena dresto.

23Mes an bobel ma a's teves kolonn yw gorth ha diwostydh;

i re dreylyas a-denewen ha gyllys yns.

24Ny leverons yn aga holonn,

‘Gwren ni perthi own a'n Arloedh agan Duw,

neb a re an glaw,

ha'n kynsa ha'n diwettha, yn y dermyn:

ev a with ragon

seythunyow ordenys an drevas.’

25Agas drogoberow re dreylyas an traow ma dhe-ves,

ha'gas peghosow re withas dader a-dhiworthowgh.

26Rag kevys yw tebeles yn mysk ow fobel :

i a gontrewayt ow skolkya kepar hag edhnoryon,

i a sett antell,

i a dhalghenn gwer.

27Par dell yw kowell leun a ydhyn,

yndellma aga chiow yw leun a doell:

rakhenna i a dheu ha dos meur, ha tevi kevoethek.

28Tevys tew yns, ha korfek.

Nyns eus finweth dh'aga drog wriansow;

ny vreusons gans gwirvreus

ken an omdhivas, may sewenno;

ha gwir an edhommogyon ny vreusons.

29A ny wrav aga hessydhya drefenn an traow ma?

yn-medh an Arloedh,

a ny vydh ow enev diellys

war genedhel a'n par ma?

30Tra varthys ha skruthus

yw hwarvedhys y'n tir;

31An brofoesi a brofoes yn fals,

an oferysi a wovern herwydh aga awtorita aga honan;5:31 herwydh aga awtorita aga honan: Po herwydh aga hevarwoedhyans, henn yw kevarwoedhyans an fals profoesi.

ha'm pobel a gar y vos yndella:

mes pandr'a wrewgh pan dheu an diwedh?