Barn war Babylon

1An ger a gewsis an Arloedh a-dro dhe Babylon, a-dro dhe bow an Kaldeanys, dre Yeremia an profoes:

2Diskleryewgh yn mysk an kenedhlow ha derivewgh,

sevewgh baner ha derivewgh,

na'n kudhewgh, leverewgh:

Babylon yw kemmerys,

Bel yw gorrys dhe veth,

Merodak yw dyegrys.

Hy imajys yw gorrys dhe veth,

hy idolyow yw digolonnek.

3Rag yn-mes a'n gogledh y teu kenedhel er hy fynn, a wra hy thir ynyal, ha ny drig denvyth ynno, ha den ha best a fi dhe-ves.

4Y'n dydhyow na hag y'n termyn na, yn-medh an Arloedh, pobel Ysrael a dheu, i ha pobel Yuda war-barth; i a dheu yn unn oela ow hwilas an Arloedh aga Duw. 5I a wovynn an fordh dhe Sion ha'ga fasow treylys war-tu hag ev, hag i a dheu ow leverel, ‘Dewgh ha glena agan honan dhe'n Arloedh gans kevambos bys vykken, na vydh ankevys.’

6Ow fobel re beu deves kellys; aga bugeledh re's ledyas yn stray, orth aga threylya dhe-ves war an menydhyow; i res eth a'n menydh dhe'n vre, i re ankovas aga horlann. 7Peub a's kavas re's devoryas, ha'ga eskerens re leveris, ‘Nyns on kablus, drefenn i dhe begha erbynn an Arloedh, an gwir beurva, ha govenek aga thasow, an Arloedh.’

8Fiewgh a gres Babylon, kewgh dhe bow an Kaldeanys, ha bedhewgh avel boghes a-rag an flokk. 9Rag otta, my a dhifun kuntelles a genedhlow meur a dir an gogledh, ha'ga dri yn-bann erbynn Babylon; hag i a omsett yn aray er hy fynn; alena hi a vydh kemmerys. Aga sethow yw avel kasor sleygh na dhehwel gwag y leuv. 10Kaldea a vydh pyllys; ha peub a's pyll a vydh gwalghys, yn-medh an Arloedh.

11Drefenn hwi dhe lowenhe, drefenn hwi dhe vos fest heudhik,

hwi dhistruoryon ow ertach,

kyn terlemmowgh avel denewes y'n aswels,

ha kryghias avel mergh krev,

12agas mamm a's tevydh meth glan,

ha hi a'gas dineythis a vydh diskrassyes.

Otta, hi a vydh an lyha a'n kenedhlow,

ynyal, syghtir, ha difeythtir.

13Drefenn sorr an Arloedh ny vydh hi annedhys,

mes y fydh ynyal kowal;

pubonan usi ow mos ryb Babylon a gemmer skruth

ha hwibana orth oll hy flaow.

14Omsettyewgh yn aray erbynn Babylon oll a-dro;

hwi oll neb a bleg an warak,

tennewgh orti, na sparyewgh sethow,

rag hi re beghas erbynn an Arloedh.

15Germewgh orti a bub tenewen,

‘Hi re omros;

hy thouryow yw koedhys,

hy fosow yw tewlys dhe'n dor.’

Rag hemm yw dial an Arloedh:

diellewgh warnedhi,

gwrewgh dhedhi an pyth a wrug hi.

16Treghewgh an gonador dhiworth Babylon,

hag ev neb a handel an gromman yn prys mysi;

drefenn kledha an arwasker

i oll a dhehwel dh'aga fobel aga honan,

hag i oll a fi dh'aga thir aga honan.

17Ysrael yw davas skattrys; lewyon re's fesyas. Yn kynsa, myghtern Assyria a's devoryas ha lemmyn y'n diwedh, Nebukadnessar myghtern Babylon re gnias hy eskern. 18Ytho, yndellma y lever Arloedh an luyow, Duw Ysrael: My a gessydh myghtern Babylon ha'y dir, par dell gessydhis myghtern Assyria. 19My a dhri Ysrael arta dh'y beurva, hag ev a voes war Karmel hag yn Bashan, ha war vreow Efraym hag yn Gilead y nown a vydh gwalghys. 20Y'n dydhyow na hag y'n termyn na, yn-medh an Arloedh, anewnder Ysrael a vydh hwithrys ha ny vydh nagonan; ha peghosow Yuda, ha ny vydh kevys nagonan; rag my a av an re a wrav aga gasa.

21Ke yn-bann erbynn tir Merathaym,

hag erbynn annedhysi Pekod,

ha'ga gorladha,

ha'ga sakra dhe dhistruyans leun,

yn-medh an Arloedh;

gwra pup-tra re worhemmynnis dhis.

22Yma tros an vatel y'n tir,

ha distruyans meur!

23Ass yw morthol oll an nor

treghys ha terrys!

Ass yw Babylon devedhys

ha bos euth yn mysk an kenedhlow!

24My a settyas maglenn ragos ha ty a veu kechys, A Babylon,

mes ny wodhyes;

ty a veu kevys ha dalghennys

drefenn ty dhe strivya erbynn an Arloedh.

25An Arloedh re igoras y arvji,

ha dri yn-mes arvow y sorr,

rag hemm yw oberenn an Arloedh Duw an luyow

yn tir an Kaldeanys.

26Dewgh er hy fynn a bub tu;

igerewgh hy greunjiow;

bernyewgh hi avel graghellow greun, ha'y distrui glan;

bedhes travyth gesys anedhi.

27Ledhewgh oll hy lodhnow,

gesewgh i dhe vones yn-nans dhe'n ladhva.

Go-i, aga dydh yw devedhys,

termyn aga hessydhyans!

28Klewir son an re a fi, hag a skap yn-mes a bow Babylon, dhe dheklarya yn Sion dial an Arloedh agan Duw, dial rag y dempel.

29Gelwewgh sethoryon erbynn Babylon, oll an re a bleg an warak. Kampyewgh oll a-dro dhedhi; na esewgh denvyth dhe dhiank. Attelewgh dhedhi war-lergh hy gweythresow; kepar dell wrug hi, gwrewgh dhedhi – rag hi re eryas an Arloedh yn falgh, an Sans a Ysrael. 30Rakhenna hy gwer yowynk a goedh yn hy flenys, hag oll hy breselyoryon a vydh distruys y'n jydh na, yn-medh an Arloedh.

31Otta, yth esov er dha bynn, A dhen balgh,

yn-medh an Arloedh, Duw an luyow;

rag dha dhydh yw devedhys,

an termyn ma'th kessydhyav.

32An den balgh a drebuch ha koedha,

heb denvyth dh'y dhrehevel,

ha my a enow tan yn y sitys,

hag a gowllesk pup-tra a-dro dhodho.

33Yndellma y lever Arloedh an luyow: Mebyon Ysrael ha mebyon Yuda o arweskys war-barth; hag oll a's kemmeras yn kethneth a's synsis fast ha nagha gasa dhedha mos. 34Aga Dasprenyas yw krev; Arloedh an luyow yw y hanow. Ev a bled aga hen yn sur, may rollo powes dhe'n tir, mes ankres dhe annedhysi Babylon.

35Kledha erbynn an Kaldeanys, yn-medh an Arloedh,

hag erbynn annedhysi Babylon,

hag erbynn hy fennsevigyon ha'y gwer dhoeth!

36Kledha erbynn an goelyogyon,50:36 goelyogyon: Po oferysi-dhargan.

mayth ellons ha bos fellyon!

Kledha erbynn hy breselyoryon,

may fons lenwys a euth!

37Kledha erbynn hy mergh ha'y charettow,

hag erbynn oll an soudoryon estren yn hy mysk,

mayth ellons ha bos avel benynes!

Kledha erbynn oll hy thresoryow,

may fons pyllys!

38Syghor erbynn hy dowrow,

may fons desyghys!

Rag yth yw tir a imajys gravys,

hag i yw foll yn aga idolyow.

39Rakhenna enyvales gwyls a vydh trigys gans an owrgeun ha strusyow a vydh trigys ynni; ny vydh hi peblys arta bys vykken, na annedhys a henedh dhe henedh. 40Par dell dhomhwelas Duw Sodom ha Gomorra ha'ga hentrevogyon, yn-medh an Arloedh, yndellma ny vydh denvyth trigys ena, na ny vydh denvyth ena avel alyon.

41Otta, yma pobel ow tos a'n gogledh;

kenedhel veur ha lies myghtern

a dhrehav a-dhiworth pella rannow an nor.

42I a syns an warak ha'n guw,

i yw fell ha ny dhiskwedhons truedh.

Aga lev a romm avel an mor;

i a varghogeth war vergh,

settys yn aray avel gour rag batel,

er dha bynn, A vyrgh Babylon!

43Myghtern Babylon a glewas nowodhow anedha,

ha'y dhiwleuv a goedhas diweres;

angoes a'n dalghennas,

ha gloesow avel benyn yn gwelivos.

44Otta, ev a dheu avel lew a-dhiworth kaswydh an Yordan erbynn peurva a dhur der an vlydhen, a-dhesempis my a's chas yn-mes anedhi. Piw yw an den dewisys a apoyntyav rag hemma? Piw yw haval dhymm? Piw a yll ow chalenjya? Piw yw an bugel a yll sevel er ow fynn? 45Ytho klewewgh kusul an Arloedh erbynn Babylon, ha'n porposys re wrug ev erbynn tir an Kaldeanys: Yn sur an lyha a'n flokk a vydh draylys dhe-ves; yn sur ev a wra aga feurva ynyal ragdha. 46An nor a gren orth an galow ‘Kemmerys yw Babylon!’ ha'n kri a vydh klewys yn mysk an kenedhlow.