1Yndellma y lever an Arloedh:

Otta, my a wra dhe dhifuna erbynn Babylon

hag erbynn annedhysi Kaldea51:1 Kaldea: Ow siwya an Septuagint. Ebrow leb-kamay ‘kolonn ow erbynnoryon’, po hanow tyller.

an spyrys a dhistruer;

2ha my a dhannvon gwynselloryon dhe Babylon,

hag i a's gwynsell.

I a wakha hy thir

pan dhons er hy fynn a bub tu

yn dydh an ahwer.

3Na esewgh an sether dhe blegya y warak,

na gwiska y gaspows.

Na sparyewgh hy gwer yowynk;

kowldhistruyewgh oll hy lu.

4I a goedh dhe'n leur ledhys yn pow an Kaldeanys,

ha gwenys yn hy stretow.

5Rag ny veu Ysrael na Yuda gwrys gwedhow

gans aga Duw, Arloedh an luyow,

kynth yw aga thir leun a gabel

erbynn an Sans a Ysrael.

6Fiewgh yn-mes a Babylon,

re sawyo peub y vewnans!

Na ewgh dhe goll drefenn hy anewnder,

rag hemm yw termyn dial an Arloedh;

ev a attal dhedhi hy gober.

7Babylon o hanaf owr yn leuv an Arloedh,

ow kul medhow oll an nor;

an kenedhlow a evas a'y gwin;

rakhenna an kenedhlow eth yn fuskok.

8Distowgh Babylon yw koedhys ha brewys;

kynewgh rygdhi!

Kemmerewgh balsam rag hy goli;

may fo martesen yaghhes.

9Ni a assayas yaghhe Babylon,

mes ny allas hi bos yaghhes.

Gesewgh hi, ha gwren ni mos

peub dh'y vro y honan;

rag hy barn re dhrehedhas bys yn nev

ha re beu drehevys hwath dhe'n ebron.

10An Arloedh re dhros yn-mes agan gwiryow:

dewgh, derivyn yn Sion

ober an Arloedh agan Duw.

11Lymmewgh an sethow!

Lenwewgh an goenyow!

An Arloedh re dhrehevis spyrys myghternedh an Medys, rag y dowl a-dro dhe Babylon yw hy distrui, rag henn yw dial an Arloedh, dial rag y dempel.

12Sevewgh baner erbynn fosow Babylon;

krevhewgh an goel;

settyewgh goelyadoryon;

pareusewgh an kontrewaytyansow;

rag an Arloedh re dewlis ha re wrug

an pyth a gewsis a-dro dhe annedhysi Babylon.

13Ty neb usi trigys ryb dowrow meur,

gans palster a dresoryow,

dha dhiwedh yw devedhys,

musur51:13 musur: Ebrow kevelin. dha vewnans yw treghys.

14Arloedh an luyow re dos re y honan:

Yn sur my a'th lenow gans luyow avel hes lokustes,

hag i a sev garm budhogoleth warnas.

15Ev yw neb a wrug an nor der y nerth,

neb a fondyas an nor gans y furneth,

ha der y gonvedhes ev a ystynnas an nevow.

16Pan dhrehav y lev yma tervans dowrow y'n nevow,

hag ev a wra niwl dhe sevel a-dhiworth pennow an nor.

Ev a wra lughes gans an glaw,

hag ev a dhre gwyns yn-mes a'y dresoryow.

17Pubonan yw talsogh ha heb godhvos;

pub owrer a's teves meth drefenn y idolyow;

rag y imajys teudh yw fals,

ha nyns eus anall ynna.

18Euver yns, ober rag ges;

yn termyn aga hessydhyans i a dhe goll.

19Nyns yw rann Yakob avella,

rag ev yw Gwrier pup-tra,

hag Ysrael yw loeth y eretons;

Arloedh an luyow yw y hanow.

Ysrael yw Fust an Gwrier

20Ty yw kaspoel dhymm, ow arv vatel:

genes my a vrew kenedhlow;

my a dhistru gwlaskordhow;

21genes my a vrew an margh ha'y varghek;

genes my a vrew an charett ha'n charetter;

22genes my a vrew gour ha benyn;

genes my a vrew hen ha yowynk;

ha genes my a vrew an gour yowynk ha'n voren;

23genes my a vrew an bugel ha'y flokk;

genes my a vrew an tiek ha'y yew a oghen;

genes my a vrew governours ha soedhogyon.

Breus Babylon

24My a attal dhe Babylon ha dhe oll annedhysi Kaldea rag oll an drog re wrussons yn Sion yn agas golok, yn-medh an Arloedh.

25Otta, yth esov er dha bynn, A menydh a dhistruyans,

yn-medh an Arloedh,

a dhistru oll an nor;

my a ystynn ow leuv er dha bynn

ha dha dhraylya dhe'n leur a'n klegeryow,

ha gul dhis bos menydh leskys.

26Ny gemmerons ahanas men rag kornell

na men rag selven

mes ty a vydh ynyalder bys vykken,

yn-medh an Arloedh.

27Drehevewgh baner y'n tir,

hwythewgh hirgorn yn mysk an kenedhlow;

pareusewgh an kenedhlow rag bresel er hy fynn,

gelwewgh er hy fynn an gwlaskordhow,

Ararat, Minni hag Ashkenaz;

ordenewgh kaslewydh er hy fynn,

drewgh yn-rag mergh avel hes51:27 hes: Ow siwya an Septuagint. Ebrow reunek. lokustes.

28Pareusewgh an kenedhlow er hy fynn,

myghternedh an Medys gans aga governours ha'ga soedhogyon

ha pub gwlas yn-dann aga gwarthevyans.

29Ha'n tir a gren hag a wynn,

rag porposys an Arloedh erbynn Babylon a sev,

dhe wul tir Babylon ynyal,

heb annedhyas.

30Breselyoryon Babylon re hepkorras omladh,

i a worta yn aga dinasow;

aga nerth re fyllis,

i res eth ha bos avel benynes;

tan re beu gorrys yn hy annedhow,

hy barrow yw terrys.

31Unn poenyer a boen dhe vetya ken onan,

hag unn gannas dhe vetya ken onan,

dhe leverel dhe vyghtern Babylon

bos y sita kemmerys a benn dhe benn:

32an rysyow re beu sesys,

ha'n gorthfosow leskys gans tan,

ha'n soudoryon a's teves own.

33Rag yndellma y lever Arloedh an luyow, Duw Ysrael:

Myrgh Babylon yw avel leur-drushya

y'n termyn mayth yw trettys;

hwath unn pols byghan

ha termyn hy threvas a dheu.

34‘Nebukadnessar myghtern Babylon re'm kollonkas,

ev re'm desyghas,

ev a wrug dhymm bos lester gwag,

ev re'm lonkas avel dragon;

ev re lenwis y dorr gans ow taklow denteth,

ev re'm trewas y'n mes.

35Re bo diellys war Babylon an drog gwrys er ow fynn hag erbynn ow hig’,

yn-medh annedhysi Sion.

‘Re bo diellys ow goes war annedhysi Kaldea’,

yn-medh Yerusalem.

36Ytho yndellma y lever an Arloedh:

Otta, my a bled dha gen

ha diella ragos.

My a dhesygh hy mor

ha gul dh'y fenten bos sygh;

37ha Babylon a vydh karnedhow,

trigva owrgeun,

tra euth ha hwibana,

heb annedhyas.

38Avel lewyon yowynk i a us war-barth;

i a romm avel kelyn lewyon.

39Yn aga gwres, my a bareus aga gwledh

ha gul dhedha omvedhwi bys pan vydhons lowenek

hag ena koska yn kosk bys vykken

heb difuna nevra, yn-medh an Arloedh.

40My a's dre dhe'n leur avel eyn dhe'n ladhva,

avel hordhes ha boghes.

41Ass yw kemmerys Sheshak,

ha sesys balghder oll an nor!

Ass yw devedhys Babylon

ha bos tra euth yn mysk an kenedhlow!

42An mor re sevis war Babylon;

hi re beu kudhys gans tervans y donnow.

43Hy sitys yw devedhys ha bos euth,

tir syghor ha difeythtir,

tir le ma nag eus trigys denvyth,

ha dredho ma na dremen mab-den.

44My a gessydh Bel yn Babylon,

ha kemmeres a'y anow an pyth re lonkas.

Ny wra an kenedhlow frosa dhodho na fella;

ynwedh fos Babylon re goedhas.

45Dewgh yn-mes anedhi, ow fobel!

Sawyewgh agas bewnans, peub ahanowgh,

a-dhiworth sorr fers an Arloedh!

46Na vedhewgh gwann agas kolonn na ownek

drefenn an nowodhow klewys y'n tir –

unn vlydhen unn hwedhel a dheu,

an nessa blydhen ken onan,

Yma freudh y'n tir,

ha rewlyas erbynn rewlyas.

47Rakhenna an dydhyow a dheu

pan gessydhav imajys Babylon;

oll hy thir a vydh gorrys dhe veth

hag oll hy re ledhys a goedh yn hy kres.

48Ena an nevow ha'n nor

ha peub eus ynna,

a arm rag lowender war Babylon;

rag an dhistruoryon a dheu er aga fynn yn-mes a'n gogledh,

yn-medh an Arloedh.

49Babylon a dal koedha drefenn an re ledhys a Ysrael,

dell goedhas re ledhys oll an nor drefenn Babylon.

50Hwi re dhienkas dhiworth an kledha,

kewgh, na daryewgh!

Perthewgh kov a'n Arloedh a-bell,

ha gesewgh Yerusalem dhe dhos yn agas brys.

51Ni yw gorrys dhe veth drefenn ni dhe glewes keredh;

disenor re gudhas agan fas,

rag estrenyon re dheuth

yn tylleryow sans chi an Arloedh.

52Rakhenna otta, an dydhyow a dheu, yn-medh an Arloedh,

pan gessydhav aga imajys gravys,

hag yn oll hy thir

an re woliys a gyn.

53Kyn yskynno Babylon dhe nev,

ha kyn kerro hy ughelder krev,

a-dhiworthiv distruoryon a dheu warnedhi,

yn-medh an Arloedh.

54Yma son kri a-dhiworth Babylon,

ha son distruyans meur a-dhiworth tir an Kaldeanys!

55Rag yma an Arloedh ow kwastya Babylon,

hag ow koselhe hy lev meur.

Aga thonnow a darenn avel dowrow pals,

son aga thros a dhassen;

56rag distruer re dheuth er hy fynn,

erbynn Babylon;

hy breselyoryon yw kemmerys,

aga gwaregow yw terrys;

rag an Arloedh yw Duw a attal,

ev a attal yn leun.

57My a wra medhwi hy fennsevigyon ha'y doethyon,

ynwedh hy governours, hy soedhogyon ha'y breselyoryon;

i a gosk yn kosk bys vykken heb difuna nevra,

yn-medh an Myghtern, ha'y hanow Arloedh an luyow.

58Yndellma y lever Arloedh an luyow:

Fos ledan Babylon

a vydh terrys dhe'n leur,

ha'y yetow ughel

a vydh leskys gans tan.

An bobel a lavur rag travyth,

ha'n kenedhlow a omskwith rag tan.

Gorhemmynn Yeremia dhe Seraya

59An ger a worhemmynnis Yeremia an profoes dhe Seraya mab Neria mab Mahseya, pan eth dhe Babylon gans Sedekia myghtern Yuda, yn peswora blydhen y reyn. Seraya o an erberjour. 60Yeremia a skrifas yn unn rol-skrifa oll an anfeusi a dho war Babylon, oll an geryow ma yw skrifys a-dro dhe Babylon. 61Ha Yeremia a leveris dhe Seraya: ‘Pan dheudh dhe Babylon, gwayt lenna oll an geryow ma, 62ha leverel, “A Arloedh, ty dha honan a gewsis erbynn an tyller ma dh'y dhistrui, ma na vydh trigys ynno travyth, naneyl den na best, hag y fydh ynyal bys vykken.” 63Pan worfennydh lenna an rol-skrifa, kelm men orti, ha'y thewlel yn kres an Ewfrates, 64ha leverel, “Yndellma Babylon a sedh; ny vydh ow sevel namoy drefenn an anfeusi a dhrov warnedhi.” ’

Hemm yw diwedh geryow Yeremia.