Reyn Sedekia ha Koedh Yerusalem

1Sekedia a'n jevo unn bloedh warn ugens pan dhallathas reynya; ev a reynyas unnek blydhen yn Yerusalem. Hanow y vamm o Hamutal myrgh Yeremia a Libna. 2Ev a wrug an drog yn golok an Arloedh, poran kepar dell wrug Yehoyakim. 3Yn hwir, mar vras o sorr an Arloedh erbynn Yerusalem ha Yuda ma's tewlis mes a'y lok.

Sedekia a rebellyas erbynn myghtern Babylon. 4Hag yn nawves blydhen y reyn, y'n degves mis, yn degves dydh an mis, Nebukadnessar myghtern Babylon a dheuth gans oll y lu erbynn Yerusalem, hag i a gampyas a-dro dhedhi; i a dhrehevis touryow-esedhva er y bynn oll a-dro. 5Ytho esedhva a veu gorrys a-dro an sita bys y'n unnegves blydhen a vyghtern Sedekia. 6Y'n nawves dydh a'n peswora mis an divoetter o mar sevur y'n sita ma nag esa boes rag pobel an tir. 7Ena aswa a veu gwrys yn fos an sita; hag oll an soudoryon a fias ha mos yn-mes a'n sita yn nos dre fordh an yet ynter an dhiw fos, ryb lowarth an myghtern, kynth esa an Kaldeanys oll a-dro dhe'n sita. I eth war-tu ha'n Araba. 8Mes lu an Kaldeanys a bursiwyas an myghtern, ha tremena dres Sedekia yn plenys Yeriko; hag oll y lu a veu skattrys a-dhiworto. 9Ena i a dhalghennas y'n myghtern ha'y dhri dhe vyghtern Babylon dhe Ribla yn pow Hamath, hag ev a ros breus warnodho. 10Myghtern Babylon a ladhas mebyon Sedekia a-rag y dhewlagas, hag ev a ladhas ynwedh oll pennsevigyon Yuda yn Ribla. 11Ena ev a worras yn-mes dewlagas Sedekia, ha'y gelmi yn kadonyow; ha myghtern Babylon a'n dhug dhe Babylon, ha'y worra yn prison bys yn dydh y vernans.

12Y'n pympes mis, yn degves dydh an mis, hag a veu nownsegves blydhen Nebukadnessar myghtern Babylon, y teuth Nebuzaradan, kapten an withysi a servya myghtern Babylon, bys yn Yerusalem. 13Ev a loskas chi an Arloedh, ha chi an myghtern, hag oll chiow Yerusalem; pub chi meur ev a loskas gans tan. 14Oll lu an Kaldeanys esa gans kapten an withysi a dorras oll an fosow a-dro dhe Yerusalem. 15Ena Nebuzaradan kapten an withysi a dhug yn divroedh re a'n dus voghosek ha remenant an bobel re beu gesys y'n sita, ha'n gilfowesigyon re gilfisa dhe vyghtern Babylon, war-barth gans remenant an greftoryon. 16Mes Nebuzaradan kapten an withysi a asas nebes an dus voghosek a'n tir dhe vos gonedhysi gwinlannow hag aradroryon.

17An kolovenyow a vrons esa yn chi an Arloedh, ha'n synsellow, ha'n mor a vrons esa yn chi an Arloedh, an Kaldeanys a dorras dhe demmyn, ha doen oll an brons dhe Babylon. 18I a gemmeras dhe-ves an kalteryow, an reuvow, an gwelsigow-porv, an basonyow, an loyow-ledan, hag oll an lestri a vrons may hwrens menystra gansa. 19Kapten an withysi a gemmeras an pojeryow ynwedh, an padellow-tan, an basonyow, an kalteryow, an golowbrennyer, ha'n bollow-offrynn, ha'n re owrek ha'n re arghansek. 20An dhew goloven, an unn mor, ha'n dewdhek tarow a vrons esa yn-dann an selyow, a wrussa myghtern Solomon rag chi an Arloedh – an brons a oll an lestri ma o dres poesa. 21Hag a-dro dhe'n kolovenyow, ughelder an unn goloven o etek kevelin, ha'y gompas o dewdhek kevelin; kow o ha'y dewder o peswar bys. 22Ha warnodho yth esa penn a vrons; ughelder unn penn o pymp kevelin; roesweyth ha greunavalow, oll yn brons, a gylghyas penn an goloven. An nessa koloven a'n jevo an keth, gans greunavalow. 23Yth esa hwetek greunaval ha peswar-ugens dhe'n tenwennow; sommenn an greunavalow a veu kans war an roesweyth a-derdro.

24Kapten an withysi a gemmeras Seraya an pennoferyas, an nessa oferyas Sefania, ha'n tri gwithyas a'n treudhow; 25hag a-dhiworth an sita ev a gemmeras unn soedhek re bia kaslewydh an vreselyoryon, ha seyth gour a gonsel an myghtern a veu kevys y'n sita; ha pennskrifennyas kaslewydh an lu neb a'n jevo charj a elwel pobel an tir yn-bann dhe'n lu; ha tri-ugens gour a bobel an tir a veu kevys a-ji dhe'n sita. 26Ha Nebuzaradan kapten an withysi a's kemmeras, ha'ga dri dhe vyghtern Babylon dhe Ribla. 27Ha myghtern Babylon a's gweskis, ha'ga gorra dhe'n mernans yn Ribla yn pow Hamath. Ytho Yuda eth yn divroedh yn-mes a'y dir.

28Hemm yw an niver a dus a veu kemmerys yn divroedh gans Nebukadnessar: y'n seythves blydhen, tri mil Yedhow ha tri warn ugens; 29y'n etegves blydhen a Nebukadnessar ev a gemmeras yn divroedh a-dhiworth Yerusalem eth kans den ha dewdhek warn ugens. 30Y'n tressa blydhen warn ugens a Nebukadnessar, Nebuzaradan kapten an withysi a gemmeras yn divroedh seyth kans den pymp ha dew-ugens; oll an dus o peswar mil hwegh kans.

Yehoyakin Livrys hag Enorys yn Babylon

31Y'n seytegves blydhen warn ugens a divroedh Yehoyakin myghtern Yuda, y'n dewdhegves mis, y'n pympes dydh warn ugens a'n mis, Evil-merodak myghtern Babylon, y'n vlydhen may tallathas reynya, a dhrehevis penn Yekoyakin myghtern Yuda, ha'y dhri yn-mes a'n prison; 32ev a gewsis dhodho yn kuv, ha ri dhodho esedh a-ugh esedhow an vyghternedh erell esa ganso yn Babylon. 33Ytho Yekoyakin a worras a-denewen y dhillas prison, ha pub dydh a'y vewnans ev a dhybri bara a-ragdho. 34Rag y alowans, alowans pub-dydhyek a veu res dhodho gans myghtern Babylon hedre vo bew, bys yn dydh y vernans.