Yerusalem yn-dann Wodros

1Fiewgh rag sawder, A hwi fleghes Benyamin,

yn-mes a Yerusalem,

ha hwytha an hirgorn yn Tekoa,

ha drehevewgh arwoedh-dan yn Beth-hakkerem:

rag drogedh a omdhiskwedh yn-mes a'n gogledh,

ha distruyans meur.

2My re hevelebis myrgh Sion

dhe beurva fethus.

3Bugeledh gans aga flokkys a dheu dhedhi;

i a dhrehav aga thyldow a-dro dhedhi;

i a beur pubonan yn y dyller.

4‘Pareusewgh bresel er hy fynn;

sevewgh, ha deun yn-bann y'n hanter-dydh.’

‘Go-ni! rag an jydh a dremen,

rag skeusow an gorthugher yw ystynnys.’

5‘Sevewgh, ha deun yn-bann y'n nos,

ha distruyn hy falesyow.’

6Rag yndella re gewsis Arloedh an luyow:

Terrewgh hy gwydh,

ha krugyewgh gweyth-esedhva erbynn Yerusalem:

Ogh, sita a falsuri!6:6 Ogh, sita a falsuri! Ow siwya an Septuagint. Ebrow Hi yw an sita a veu gesys yn sawder.

nyns eus marnas arwask ynni.

7Dell wra puth gwitha y dowrow govynn,

yndellma hi a gwith yr hy thebelwrians:

freudh ha diswrians yw klewys ynni;

yma galar ha goliow prest a-ragov.

8Bedhes dyskys, A Yerusalem,

ma na dreyllyo ow enev divlasys ahanas;

ma na'th wrav ynyal,

tir anannedhys.

9Yndellma y lever Arloedh an luyow:

I a wra leun dhestryppya remenant Ysrael

avel gwinbrenn:

avel kuntellor gwinreun treyl dha leuv arta

war on skorrennow.

10Piw y kowsav dhodho, ha ri gwarnyans,

may klewvons?

Otta, aga skovarn yw antrodreghys,

ha ny's teves goslowes;

otta, ger an Arloedh yw keredh dhedha;

ny's teves lowender ynno.

11Ytho leun ov vy a gonnar an Arloedh;

skwith ov vy owth omfronna.

Gwra hy dinewi war an fleghes y'n stret,

ha war guntelles an wer yowynk maga ta:

rag hwath an gour gans an wreg a vydh maglennys,

an henavek ha'n den leun a dhydhyow.

12Aga chiow a dremen dhe re erell,

parkow ha gwragedh maga ta:

rag my a ystynn ow leuv

war drigoryon an tir,

yn-medh an Arloedh.

13Rag a'n lyha anedha bys y'n meurra

pubonan yw hwansek dhe wayn anewn;

hag a'n profoes bys y'n oferyas

pubonan a wra falsuri.

14I re sawyas goli myrgh ow fobel gans skavder,

ow leverel, ‘Kres, kres’,

pan nag eus kres.

15Esa meth dhedha pan wrussons pyth kasadow?

Na, ny's teva meth vytholl,

na ny's teva rudha:

rakhenna i a wra koedha yn mysk an re a goedh:

y'n termyn ma's kessydhyav i a vydh domhwelys,

yn-medh an Arloedh.

16Yndellma y lever an Arloedh,

Sevewgh war an fordhow, ha mirewgh

ha hwilewgh an hynsyow koth,

le mayth yw da an fordh; ha kerdhes ynni

ha hwi a gyv powes dh'agas enevow.

Mes yn-medhons, ‘Ny vynnyn kerdhes ynni.’

17Ha my a worras goelyadoryon warnowgh,

ow leverel, ‘Goslowewgh orth son an hirgorn.’

Mes yn-medhons, ‘Ny vynnyn goslowes.’

18Rakhenna klewewgh, hwi genedhlow,

ha godhvydhewgh, A guntelles, pandr'a hwyrvydh dhedha.

19Klew, A norvys: otta, my a dhre drogedh war an bobel ma,

frut aga frederow,

drefenn na woslowsons orth ow geryow,

nag orth ow lagha, mes hy nagha.

20Pandr'a amont dhymm frankynkys a-dhiworth Sheba,

ha'n kalamus6:20 kalamus: Korsenn hweg, Acorus calamus, ynperthys dhe'n Tir Sans dhiworth Eynda yn furv polter. Pur dalvosek o, ha devnydhys yn oyl sans an untyans, Eks 30:23 hag y'n melysethow an moyha drudh. drudh a bow pell?

Nyns yw agas offrynnow leskys kemmeradow,

na nyns yw agas sakrifisow hweg plegadow dhymm.

21Ytho yndellma y lever an Arloedh:

Otta, my a worr a-rag an bobel ma

sklanderyow may hwra koedha warnedha

tasow ha mebyon war-barth;

an kentrevek ha'y goweth a dhe goll.

22Yndellma y lever an Arloedh:

Otta, yma pobel ow tos a'n pow kledh,

ha kenedhel veur a vydh difunys a bella rannow an nor.

23I a dhalghenn an warak ha'n guw;

fell yns, ny's teves truedh;

aga lev a romm kepar ha'n mor;

i a varghogeth war vergh,

arayys rag kas avel gwer bresel

er dha bynn, A vyrgh Sion.

24‘Ni re glewas son anodho:

diweres yw agan diwleuv:

angoes re'gan dalghennas,

ha poen avel benyn yn gwelivesi.

25Na ge yn-mes dhe'n gwel;

na kerdhes war an fordh;

rag yma kledha dhe'n eskar,

hag euth a bub tu.’

26A vyrgh ow fobel, omwrogys yn yskar,

hag omrol yn lusu:

gwra kyni, avel rag dha unn vab,

kynvann a'n hwerwa:

rag a-dhistowgh an distruer

a dheu warnan.

27My re'th wrug assayer a alkan yn mysk ow fobel, ha purheor6:27 purheor: Amendys, ow siwya an Septuagint ha'n Vulgat.

rag may hwodhvi hag assaya aga fordhow.

28I oll yw rebellys worth,

ow kerdhes gans sklanderyow:

brest ha horn yns i;

meschyv a wrons i oll.

29An meginow a hwyth,

an plomm yw kowlleskys gans an tan;

an teudher a deudh yn euver;

rag nyns yw an debeles terrys dhe-ves.

30Gelwys yns ‘arghans deneghys’,

drefenn an Arloedh dh'aga denagha.