1Y'n termyn na, yn-medh an Arloedh, i a dhre yn-mes eskern myghternedh Yuda, hag eskern y bennsevigyon, hag eskern an oferysi, hag eskern an brofoesi, hag eskern annedhysi Yerusalem, yn-mes a'ga bedhow: 2hag i a's les a-rag an howl ha'n loer, hag oll lu an nevow, re wrussons aga hara ha'ga servya, ha kerdhes war aga lergh, ha'ga hwilas ha'ga gordhya; ny vydhons kuntellys, nag ynkleudhys; i a vydh avel teyl war enep an nor. 3Mernans a vydh dewisys kyns es bewnans gans oll an re gesys a'n tebel deylu ma, neb a worta yn oll an tylleryow le ma's herdhis, yn-medh Arloedh an luyow.

Peghes ha Kessydhyans

4Ty a lever dhedha: Yndellma y lever an Arloedh:

Pan wra tus koedha, a ny wrons i sevel arta?

Mar kwra nebonan treylya, a ny dhehwel?

5Ytho prag y hwrug an bobel ma, Yerusalem,

treylya yn kildennans pup-prys?

I a syns fast dhe doell,

i a nagh dehweles.

6My a woslowas ha klewes,

mes ny gewsons yn ewn:

ny goedhas denvyth yn edrek a'y dhrogedh,

ow leverel, ‘Pandr'a wrug vy’?

I oll a dreyl dh'aga resegva,

par dell fysk margh sket dhe'n vatel.

7Hwath an hwibon y'n nevow

a aswonn y dermynyow;

ha'n durenn ha'n wennel ha'n aran

a aswonn termyn aga devedhyans;

mes ny aswonn ow fobel vy

breus an Arloedh.

8Fatell yllowgh leverel, ‘Fur on,

hag yma lagha an Arloedh genen’?

Otta, hi re beu treylys yn gow

gans pluvenn wowek an skribys.

9Yma meth dhe'n dus fur,

dyegrys yns ha kechys:

otta, i re naghas ger an Arloedh,

ha pana furneth eus dhedha?

10Ytho my a re aga gwragedh dhe re erell

ha'ga farkow dhe'n re a's erit:

rag pubonan a'n lyha dhe'n moyha

yw kemmerys gans krefni;

a'n profoes bys y'n oferyas

pubonan a dhyght yn fals.

11Rag i re sawyas goli myrgh ow fobel gans skavder,

ow leverel, ‘Kres, kres’,

pan nag eus kres.

12Esa meth dhedha pan wrussons pyth kasadow?

Na, ny's tevo meth vytholl,

na ny's tevo rudha.

Ytho i a wra koedha yn mysk an re a goedh:

yn termyn aga hessydhyans i a vydh domhwelys,

yn-medh an Arloedh.

13My a's kuntell yn leun,8:13 My a's kuntell yn leun: Po My a gemmer dhe-ves aga threvas ow siwya an Septuagint. yn-medh an Arloedh:

ny vydh gwinreun war an gwinbrenn,

na ny vydh figys war an figbrenn,

ha'n del a wedher;

ha'n pyth a res dhedha a dremen a-dhiworta.

14Prag yth on esedhys stag?

Omguntellewgh, hag entryn y'n sitys kerys,

ha merwel ena:

rag an Arloedh agan Duw re'gan daskorras dhe'n mernans,

ha ri dhyn dowr gwenonek dhe eva,

drefenn ni dhe begha erbynn an Arloedh.

15Agan govenek a veu kres, mes nyns esa dader;

termyn yeghes, hag otta browagh.

16Ronkow aga mergh a veu klewys a-dhiworth Dan:

orth son kryghias aga mergh krev

an tir kowal a grenas;

i re dheuth ha gwastya an tir, ha pup-tra eus ynno:

an sita ha'n re usi trigys ynni.

17Rag, otta, my a dhannvon serf, nadres, yn agas mysk,

na yll bos husys,

hag i a'gas brath,

yn-medh an Arloedh.

Galar Yeremia rag y Bobel

18Nyns eus eli rag ow anken;8:18 Nyns eus eli rag ow anken: Amendys, ow siwya an Septuagint.

ow holonn yw klav.

19Otta, lev kri myrgh ow fobel

dre hys ha les an tir:

‘A nyns usi an Arloedh yn Sion?

A nyns usi hy myghtern ynni?’

‘Prag y hwrussons ow frovokya dhe sorr

gans aga imajys gravys

ha'ga idolys estren koeg?’

20‘An drevas yw tremenys, an hav yw gorfennys,

ha nyns on ni sawys.’

21Rag pystik myrgh ow fobel yth ov pystigys;

kyni a wrav; euth re'm dalghennas.

22A nyns eus balsam yn Gilead?

a nyns eus medhek ena?

Ytho prag nag eus yaghheans

rag myrgh ow fobel?