1Geryow Yeremia mab Hilkia, onan a'n oferysi esa yn Anathoth yn pow Benyamin, 2may teuth dhodho ger an Arloedh yn dydhyow Yosia mab Amon myghtern Yuda, yn trydhegves blydhen y reyn. 3Y teuth ynwedh yn dydhyow Yehoyakim mab Yosia myghtern Yuda, bys yn diwedh unnegves blydhen Sedekia mab Yosia myghtern Yuda, bys yn kethneth Yerusalem y'n pympes mis.

Galow Yeremia

4Ger an Arloedh a dheuth dhymm, ow leverel,

5‘Kyns my dhe'th formya y'n dorr my a'th aswonnis;

ha kyns ty dhe dhos yn-mes a'n brys my a'th sakras,

ha'th worra dhe vos profoes dhe'n kenedhlow.’

6Ha my a leveris, ‘Ogh Arloedh DUW, otta, ny wonn kewsel, rag yowynk ov.’ 7Ha'n Arloedh a leveris dhymm,

‘Na lavar “Yowynk ov”;

mes mos a wredh dhe biwpynag may hwrylliv vy dha dhannvon dhodho,

ha ty a lever pypynag a worhemmynniv dhis.

8Na borth own a-ragdha,

rag yth esov genes, dhe'th telivra,

yn-medh an Arloedh.’

9Ha'n Arloedh a ystynnas y leuv ha tochya ow ganow. Hag yn-medh an Arloedh dhymm,

‘Awotta, my re worras ow geryow y'th hanow.

10Mir, my re'th apoyntyas hedhyw war an kenedhlow ha war an gwlaskordhow,

dhe dhiwreydhya, ha dhe derri dhe'n dor,

dhe dhistrui, ha dhe dhiswul;

dhe dhrehevel ha dhe blansa.’

11Ger an Arloedh a dheuth dhymm, ow leverel, ‘Yeremia, pandr'a welydh?’ Ha my a leveris, ‘My a wel gwelenn a wydhenn alamand.’ 12Ena an Arloedh a leveris dhymm, ‘Ty re welas yn ta: rag my a wra goelyas war ow ger dh'y wrythya.’ 13Ha ger an Arloedh a dheuth dhymm y'n nessa prys, ow leverel, ‘Pandr'a welydh?’ Ha my a leveris, ‘My a wel kalter ow pryjyon; ha'n fas anodho yma dhe'n gogledh.’

14Ena an Arloedh a leveris dhymm: Yn-mes a'n gogledh tebeledh a wra tardha war oll annedhysi an tir. 15Rag, otta, my a wra gelwel oll teyluyow gwlaskordhow an gogledh, yn-medh an Arloedh; hag i a wra dos, hag i a wra settya pubonan y dron dhe entrans yetow Yerusalem, hag erbynn an fosow anedhi a-derdro, hag erbynn sitys oll Yuda. 16Ha my a lever ow breusow er aga fynn drefenn aga sherewynsi; rag i re'm eskasas, ha re loskas offrynnow dhe dhuwow erell, ha gordhya oberow aga diwla aga honan. 17Ty ytho grogys dha dhiwglun, ha sevel, ha kewsel dhedha pup-tra a worhemmynnav dhis: na vydh ownek a-ragdha, ma na'th ownekhav a-dheragdha. 18Rag, otta, my re'th wrug y'n jydh ma sita gerys, ha koloven a horn, ha fosow a vrons erbynn an tir kowal, erbynn myghternedh Yuda, erbynn aga fennternedh, erbynn aga oferysi, hag erbynn pobel an tir. 191 Hag i a wra omladh er dha bynn; mes ny wrons fetha; rag my a vydh genes, yn-medh an Arloedh, dhe'th telivra.