1‘Kasadow yw ow bewnans dhymm;

my a lever ow krodhvol yn rydh;

my a gews yn hwerowder ow enev.

2My a lever dhe Dhuw, Na'm dampen;

lavar dhymm, pyth yw dha guhudhans er ow fynn.

3A hevel bos da dhis arwaska,

kasa ober dha dhiwleuv

ha splanna war dowlow tebelwesyon?

4Eus dewlagas a gig dhis?

A welydh kepar dell wel mab-den?

5Yw dha dhydhyow kepar ha dydhyow mab-den,

po dha vlydhynyow kepar ha blydhynyow gour,

6may hwovynnydh a-dro dhe'm kammweyth

ha hwilas ow fegh,

7kyn hwodhes nag ov kablus,

ha nyns eus denvyth dhe dhelivra yn-mes a'th leuv?

8‘Dha dhiwleuv a'm formyas hag a'm gwrug;

ha lemmyn ty a dreyl hag a'm distru.

9Porth kov, ty dhe'm gul a bri;

a vynnydh ow threylya dhe dhoust arta?

10A ny'm diversys kepar ha leth

ha'm kowla kepar ha keus?

11Ty a'm dillesas gans kroghen ha kig,

ha'm gwia war-barth gans eskern ha giow.

12Ty a wrontyas dhymm bewnans ha tregeredh,

ha dha vern re withas ow spyrys.

13‘Mes ty a gudhas an taklow ma y'th kolonn;

my a woer y feu hemma y'th vrys.

14Mar peghav, ty a'm merk,

ha ny'm assoylydh a'm kammweyth.

15Mars ov kablus, go-vy!

Mars ov gwiryon, ny allav drehevel ow fenn,

drefenn ow bos lenwys a veth

ha gwalghys a alar.

16Mar trehavav ow fenn, ty a'm helgh kepar ha lew;

hag arta gul marthusyon er ow fynn.

17Ty a dhre dustuni nowydh er ow fynn,

ha moghhe dha sorr orthiv;

ty a dhre luyow nowydh er ow fynn.

18‘Prag y'm dresys yn-mes dhiworth an brys?

Unnweyth a kwrellen vy tremena kyns lagas dhe'm gweles,

19a pen vy kepar dell na vien,

degys dhiworth an brys dhe'n bedh.

20A nyns yw boghes dydhyow ow bewnans?

Gas vy ow honan, may hylliv kavoes nebes konfort

21kyns my dhe vos le ma na dhehwelav,

dhe'n pow a dewolgow ha tewlder down,

22dhe bow a dewlder down, a dhuder ha deray,

le mayth yw golow kepar ha duder.’