Kynsa Areth Sofar

1Ena Sofar an Naamathyas a worthybis:

2‘A dal an niver bras ma a eryow bos heb gorthyp,

ha gour leun a gows bos justifiys?

3A dal dha glapp gul tus dhe dewel,

ha pan skornydh, a ny wra denvyth dha shamya?

4Rag ty a lever, “Pur yw ow dyskas,

ha glan ov yn dewlagas Duw.”

5Mes unnweyth a mynna Duw kewsel,

hag igeri y dhiwweus dhis,

6ha diskwedhes dhis an kevrinyow a furneth!

Rag liesplek yw y dhoethter!

Godhvydh ytho Duw dhe jalenjya ahanas le ages dell dhervynn dha gammweyth.

7‘A yllydh hwithra an taklow down a Dhuw?

A yllydh diskudha finweth an Ollgalloesek?

8Ughella yw ages nev – pandr'a yllydh y wul?

Downa ages ifarn – pandr'a yllydh y wodhvos?

9Hirra ages an norvys yw y vusur,

ha ledanna ages an mor.

10Mar tremen ev, ha prisonya,

ha gelwel dhe vreus, piw a yll y lettya?

11Rag ev a aswonn tus koeg;

pan wel ev anwiryonedh, a ny wra ev prederi a-dro dhodho?

12Mes gour gokki a gyv konvedhes,

pan yw ebel asen gwyls dineythys avel den!

13‘Mar pareusydh dha golonn,

hag ystynn dha leuv trohag ev,

14mar korrydh pell dhe-ves an anewnder usi y'th leuv,

ha na esydh kammhynseth dhe driga y'th tyldow,

15ena ty a dhrehav dha fas heb namm;

ty a fydh fyrv, ha ny vydh own dhis.

16Ty a ankev dha anken;

ty a berth kov anodho kepar ha dowrow re dremenas.

17Dha vewnans a vydh dergha ages howl an hanter-dydh;

y dewlder a vydh kepar ha'n myttin.

18Ty a' fydh diogeledh, rag yma govenek;

ty a vydh gwithys, ha ty a bowes yn sawder.

19Ty a wrowedh, ha denvyth ny worr own ynnos;

lies den a hwila dha favour.

20Mes dewlagas an debeles a fyll;

ha ny vydh fordh dhe dhiank ragdha,

ha'ga govenek a vydh anella aga anall dhiwettha.’