Gorthyp Job dhe Sofar

1Ena Job a worthybis:

2‘Hwi yw an bobel, heb mar,

ha furneth a verow genowgh.

3Mes yma konvedhes dhymm keffrys ha dhywgh hwi;

nyns ov isella agesowgh.

Piw eus na woer traow kepar ha'n re ma?

4Skornys ov gans ow howetha;

kyn helwis war Dhuw hag ev a worthybis,

den skornys ov, ewn ha divlam.

5Tus yw attes a dhispres anfeus,

mes parys yw hi rag tus may hwra aga dewdroes trebuchya.

6Yn kres yw tyldow ladron,

hag yn sawder yw an re a brovok Duw,

neb a dhre aga duw yn aga leuv.

7‘Mes govynn orth an bestes, hag i a dhysk dhis;

ydhyn an ayr, hag i a lever dhis;

8po kows dhe'n norvys, hag ev a dhysk dhis,

ha puskes an mor a dhiskler dhis.

9Piw eus yn mysk oll re ma na woer

leuv Duw dhe wul hemma?

10Yma yn y leuv bewnans pup-tra a vew

hag anall densys oll.

11A ny wra an skovarn assaya geryow

kepar dell wra an stevnik blasa boes?

12Yma furneth gans an dus koth,

ha konvedhes yn hirder dydhyow.

13‘Yma furneth ha galloes gans Duw,

yma dhodho kusul ha konvedhes.

14Mar tewl ev dhe'n dor, ny yll denvyth dastrehevel;

mar tege ev gour a-bervedh, ny yllir igeri.

15Mar skon ev an dowrow, i a sygh;

mar kwra ev aga dyllo, i a fenn an tir.

16Ganso yma nerth ha doethter;

dhodho yma an den toellys ha'n den a doell.

17Ev a led konseloryon dhe-ves dieskis,

hag ev a wra dhe vuskogyon bos breusysi.

18Ev a lews kargharow myghternedh,

ha kelmi kyngel a-dro dh'aga diwglun.

19Ev a led oferysi dhe-ves dieskis,

ha domhwel an re alloesek.

20Ev a dhege diwweus an re yw trestys,

ha kemmeres dhe-ves skians an henavogyon.

21Ev a dhinwa bismer war bennsevigyon,

ha lewsel grogys an re yw krev.

22Ev a dhiskudh an downderyow yn-mes a dewlder,

ha dri tewlder down dhe wolow.

23Ev a wra dhe genedhlow bos meur, hag ev a's distru;

ev a voghha kenedhlow, ha'ga ledya dhe-ves.

24Ev a gemmer dhe-ves konvedhes dhiworth rewloryon pobel an tir,

ha gul dhedha gwandra yn difeyth heb fordh.

25I a balval y'n tewlder heb golow;

hag ev a wra dhedha trebuchya kepar ha den medhow.