1‘Otta, ow lagas re welas oll hemma,

ow skovarn re woslowas orto ha'y gonvedhes.

2An pyth a wodhowgh, my ynwedh a'n goer;

nyns ov isella agesowgh.

3Mes my a vynn kewsel orth an Ollgalloesek,

hag yma hwans dhymm a dhadhla an kas gans Duw.

4Saw byttegyns hwi a'm gwynngalgh gans gowyow,

koeg vedhogyon owgh hwi oll.

5Unnweyth a mynnewgh tewel!

Ragowgh hwi, y fia furneth.

6Klewewgh lemmyn ow dadhel,

ha goslowewgh orth pledyansow ow diwweus.

7A vynnowgh kewsel yn trog a-barth Duw?

A vynnowgh leverel anewnder ragdho?

8A vynnowgh diskwedhes faverans trohag ev,

a vynnowgh pledya an kas a-barth Duw?

9A vydh da genowgh pan wra aga gorthapposya?

Po a yllowgh y doella, kepar dell doellir den?

10Ev a wra agas keredhi yn sur

mar tiskwedhowgh faverans yn-dann gel.

11A ny wra y veuredh agas broweghi,

ha'n agha anodho koedha warnowgh?

12Agas lavarennow yw henlavarow a lusu,

agas gorthybow yw gorthybow a bri.

13‘Tewewgh, ha gesewgh my dhe gewsel,

ha re dheffo dhymm pynag a dheffo.

14Prag y kemmerav ow hig y'm dyns,

ha gorra ow bewnans y'm dorn?

15Kyn hwra ev ow ladha; yma govenek dhymm;

byttegyns my a dhefend ow fordhow a-rag y fas.

16Hemma a vydh ow selwyans,

rag ny vedh den didhuw dos a-ragdho.

17Goslowewgh gans rach orth ow geryow,

ha gesewgh ow diskleryans dhe vos yn agas diwskovarn.

18Otta, my re bareusis ow has;

my a woer y fydhav justifiys.

19Eus nebonan a yll dri kuhudhans er ow fynn?

Mar pe, my a via taw ha tremena.

20‘Gront dhymm an dhew dra ma, a Dhuw

ena ny wrav omgudha dhiworth dha fas:

21kildenn dha leuv pell dhiworthiv,

ha na as agha ahanas dhe'm broweghi.

22Ena galw, ha my a worthyp,

po gas vy dhe gewsel, ha gorthyp dhymm.

23Py lies yw ow hammweythresow ha'm peghosow?

Gwra dhymm godhvos ow threuspass ha'm pegh.

24Prag y kudhydh dha fas,

ha krysi ow bos dha eskar?

25A vynnydh tormentya delenn hwythys gans an gwyns?

a vynnydh chasya kulyn sygh?

26Rag ty a skrif taklow hwerow er ow fynn,

ha gul dhymm erita kammweythresow ow yowynkneth.

27Ty a worr ow dewdroes y'n stokkys,

ha mires orth oll ow hynsyow;

ty a gerv dha hanow y'm konna-troes.

28Den a dhe goll kepar ha tra bodrek,

kepar ha dillas dybrys gans goedhanes.