1‘Mab-den, genys a venyn,

yw kott y dhydhyow, ha leun a anken.

2Ev a dyv yn-bann kepar ha bleujenn hag a wedher,

ev a fi kepar ha skeus, ha ny worta.

3A igerydh dha dhewlagas war onan a'n par ma,

ha'y dhri dhe vos breusys genes?

4Piw a yll dri neppyth glan dhiworth neppyth mostys?

Denvyth.14:4 Gwersow 1 bys 4 – cf. TH7r.

5Y dhydhyow yw ervirys,

yma niver y visyow godhvedhys genes,

ty re apoyntyas y finwethow na yll ev tremena dresta;

6ytho mir dhe-ves dhiworto ha'y asa yn kres,

bys pan worfenno y dhydh avel gwas arvethys.

7‘Rag yma govenek dhe wydhenn:

mars yw treghys dhe'n dor, hi a skyll arta,

ha ny fyll hy eginyow.

8Kyn kothha hy gwreydhenn y'n dor,

ha'y hyf a verow y'n gweres,

9hwath der an ethenn a dhowr hi a vleujyow

ha dyllo eginyow kepar ha plans yowynk.

10Mes gour a verow ha difygya;

dhe wir, den a anell y dhiwettha anall ha ple'ma ev?

11Kepar dell fyll dowr dhiworth lynn,

po avon a leha ha sygha,

12yndella y hwrowedh gour ha ny sev;

bys pan nag eus nev na fella, ny dhifunons,

na ny dhons yn-mes a'ga hosk.

13Unnweyth a kwrelles ow kudha yn ifarn,

ow heles erna vo dha sorr tremenys,

apoyntya termyn ragov ha perthi kov ahanav!

14Mar merow gour a wra ev bewa arta?

Oll an dydhyow a'm servis my a worta

bys pan dheffo ow thorn.

15Ty a elow ha my a worthyp dhis;

y fydh hwans dhis a weyth dha dhiwleuv.

16Saw lemmyn ty a niver ow hammow,

ow kwitha war ow fegh.

17Selys yn sagh yw ow threuspass,

ha ty a gudh ow hammweythres.

18‘Mes kepar dell wra menydh koedha, ha'n radell yw skubys dhe-ves,

ha dell yw karrek removys yn-mes a'y le;

19dell wra dowr esknias an meyn,

ha kowasow a skub dhe-ves doust an dor,

yndella ty a dhistru govenek den.

20Ty a warthev warnodho bys vykken, hag ev a dremen;

ty a janj y fas ha'y dhannvon dhe-ves.

21Enorys yw y vebyon ha ny'n goer ev;

iselhes yns, ha ny'n gwel.

22Ny'n jeves payn saw rag y gorf y honan,

ha ny wra kyni saw rag y enev y honan.’