Nessa Areth Elifaz

1Ena Elifaz an Temanyas a worthybis:

2‘A dal den fur gorthybi gans godhvos gwynsek,

ha lenwel y dorr a wyns an est?

3A dal ev dadhla gans kows nag yw dhe les,

po gans arethyow nag eus dhedha prow?

4Dar, ty a bellha an own a Dhuw,

ha lesta ombreder a-dheragdho.

5Rag dha dhrogober a dhysk dha anow,

ha ty a dhewis taves an dus fel.

6Dha anow dha honan a'th tampen, na my;

dha dhiwweus dha honan a dhustuni er dha bynn.

7‘Osta an kynsa den a veu dineythys?

Po a veus genys kyns an breow?

8A woslewsys yn konsel kevrinek Duw?

Hag a withydh furneth dhiso dha honan?

9Pandr'a wodhes na wodhon ni?

Pandr'a gonvedhydh nag yw kler dhyn ni?

10Genen yma ha'n dus loes aga blew ha tus pur goth,

kottha yn feur ages dha das.

11Yw solas Duw re vyghan ragos,

po ger kewsys genes yn hwar?

12Prag y hwra dha golonn dha dhoen dhe-ves?

Ha prag y hwra dha dhewlagas lughesi,

13may treylydh dha spyrys erbynn Duw,

ha gasa dhe'n geryow na mos yn-mes a'th hanow?

14Pyth yw mab-den, may hyll bos glan?

po ev neb yw dineythys a venyn, may hyll bos gwiryon?

15Otta, ny worr Duw fydhyans yn y syns,

ha nyns yw an nevow glan yn y wolok;

16pyseul dhe le yn mab-den yw kasadow ha legrys,

yn gour a yv kammhynseth kepar ha dowr!

17‘My a dhiskwa dhis, goslow orthiv;

ha'n pyth re welis my a dheriv –

18an pyth a veu disklerys gans tus fur,

ha na veu kudhys ragdha gans aga thasow,

19dhe neb aga honan y feu res an tir,

ha ny dremenas estren yn aga mysk.

20An tebelwas a berth payn dres oll y dhydhyow,

ha kreunys yw rag an turant dres oll y vlydhynyow.

21Yma sonyow euthyk yn y dhiwskovarn;

yn sewena an distruer a dheu warnodho.

22Ny grys ev y tehwel yn-mes a dewlder,

ha destnys yw rag an kledha.

23Ev a wander a-dro rag bara, ow leverel, “Ple'mava?”

Ev a woer bos dydh an tewlder yn y ogas;

24ahwer hag ankres a wra y euthega;

i a warthev warnodho, kepar ha myghtern parys rag batel;

25rag ev re ystynnas y leuv erbynn Duw,

ha krevhe y honan erbynn an Ollgalloesek,

26ow poenya er y bynn gans y benn yn rag,

gans skoes tew y vothow.

27‘Kyn fo y fas kudhys gans blonek,

ha kyn fo meur a vlonek war y dhiwglun,

28ev a vydh trigys yn sitys ynyal,

hag yn chiow ma na drig denvyth ynna,

hag a verr spys y fydhons magoryow.

29Ny vydh ev rych na fella ha ny bes y wolusogneth,

ha ny omles y wreydh15:29 y wreydh: Ow siwya an Vulgat. Styr an Ebrow yw ankler. der an wlas;

30ny wra ev skapya dhiworth an tewlder;

an flamm a wra sygha y skyll,

ha'y vleujyow a vydh hwythys dhe-ves gans an gwyns.

31Na drestyes ev yn euveredh, owth omdoella,

rag gwakter a vydh y wober.

32Y balmwydhenn15:32 Y balmwydhenn: Amendys. a wedher kyns y dermyn,

ha ny vydh glas y skorrenn.

33Ev a vydh avel gwinbrenn a shak dhe-ves y rappys anadhves,

kepar hag olewbrenn a dewl dhe-ves y vleujyow.

34Rag kuntelles an dus dhidhuw yw anvap,

ha tan a lesk an tyldow a falswober.

35I a gonsev dregynn, ha dineythi droktra,

ha'ga thorr a dharbar toell.’