Gorthyp Job dhe Elifaz

1Ena Job a worthybis:

2‘My re glewas lies tra a'n par na;

konforters ow ri dhymm ahwer owgh hwi oll:

3“A vydh diwedh dhe'th eryow gwynsek?”

po “Pyth a wra dhis mar hardh ow tadhla?”

4My ynwedh a allsa kewsel kepar dell wrewgh,

mar pewgh y'm tyller vy.

My a allsa junya geryow war-barth er agas pynn,

ha shakya ow fenn orthowgh.

5Mes na, my a wrussa agas kennertha gans ow ganow,

ha gwayans ow diwweus a wrussa siwajya agas duwon.

6‘Mar kowsav, nyns yw ow duwon siwajys:

ha mar tawav, a gavav difres?

7Mes lemmyn Duw re wrug dhymm bos skwith;

ev re dhistruis oll ow mayni.

8Ev re wrug dhymm gwedhra,

ha henna yw dustuni er ow fynn;

ow gwannegredh a sev yn-bann er ow fynn

ha henna a re dustuni dhe'm fas.

9Ev re'm skwardyas yn y sorr ha'm kasa;

ev a dheskern y dhyns er ow fynn;

ow eskar a lymm y dhewlagas warnav.

10Tus re lagattas orthiv, igerys aga ganow;

i re'm gweskis orth ow bogh yn unn skornya;

i re omguntellas war-barth er ow fynn.

11Duw re'm delivras dhe'n den didhuw,16:11 den didhuw: Amendys.

ha'm ri yn diwla an debeles.

12Attes en vy, mes ev a'm brewis;

ev a'm sesyas er kil ow honna, ha'm shakya dhe demmigow.

Ev a'm settyas yn-bann avel y gostenn,

13ha'y sethoryon a'm kyrghynn.

Ev a wan ow diwloneth yn tibita,

ha diveri ow bystel war an dor.

14Ev a wrug aswa wosa aswa ynnov;

ev a boen er ow fynn kepar ha kasor.

15‘My re wias yskar war ow kroghen,

ha gorra ow horn y'n doust.

16Rudhys yw ow fas drefenn oela,

hag yma tewlder down war groghen ow dewlagas,

17nyns eus freudh yn ow diwleuv,

ha pur yw ow fysadow.

18‘A dhor, na gorher ow goes;

ha na geves ow kri powesva.

19Ha lemmyn, otta, yma ow dustunier y'n nev,

hag yma ow thest y'n ughelder.

20Ow howetha a'm skorn;

ow lagas a dhinew dagrow dhe Dhuw.

21Unnweyth a pe neb a blettya rag gour gans Duw,

kepar dell bled mab-den rag y gentrevek!

22Rag wosa nebes blydhynyow dhe dhos,

yth av war an hyns ma na dhehwelav dhiworto.