Job a Bys rag Difres

1‘Terrys yw ow spyrys, difeudhys yw ow dydhyow,

parys yw an ynkleudhva ragov.

2Yma skornyoryon a-dro dhymm yn sur,

ha'm lagas a bes ow mires orth aga eskarogeth.

3‘Sett goestel ragov genes lemmyn;

piw arall a vynn shakya leuv genev?

4Rag ty re geas aga holonn dhe gonvedhes,

rakhenna ny's gesydh dhe dryghi.

5Neb a guhudh y gowetha rag gober,

dewlagas y vebyon a fyll.

6‘Ev a wrug dhymm bos henlavar a'n poblow,

ha tus a drew y'm fas.

7Ow lagas re dheuth ha bos gwann drefenn duwon,

ha kepar ha skeus yw oll ow eseli.

8An re ewnhynsek a skruth gans hemma,

ha'n den divlam yw yntanys erbynn an den didhuw.

9An den gwiryon a bes war y fordh,

ha'n den glan y dhiwleuv yw krevhes moy ha moy.

10Mes hwi oll, dewgh, ha dehwelewgh arta!

Ny gavav unn den fur yn agas mysk.

11Tremenys yw ow dydhyow, terrys yw ow thowlow,

ha hwansow ow holonn.

12Nosweyth a vydh dydhweyth, yn-medhons,

golow yw ogas; mes yth esov yn tewlder.

13Mar kwaytyav ifarn dhe vos ow chi,

ha lesa ow gweli y'n tewlder,

14mar lavarav dhe'n pytt, “Ty yw ow thas”,

ha dhe'n gontronenn, “Ty yw ow mamm ha'm hwoer”,

15ple'ma ow govenek lemmyn?

Piw a yll gweles govenek ragov?

16A wra ev diyskynna genev dhe ifarn?

A wren ni diyskynna war-barth a-berth y'n doust?’