Nessa Areth Bildad

1Ena Bildad an Shuhyas a worthybis:

2‘Pes termyn y fydh kyns hwi dhe worfenna an arethyow ma?

Bedhewgh fur hag a-wosa ni a geskews.

3Prag yth on ni reknys avel chatel,

ha synsys dhe vos avlan yn agas dewlagas?

4Ty neb a skward y honan y'th sorr,

a vydh res an norvys dhe vos forsakys ragos?

Hag a vydh an garrek removys mes a'y le?

5‘Dar, golow an drogoberer yw difeudhys,

ha ny splann flamm y dan.

6Tewl yw an golow yn y dylda,

ha'n lugarn a-ughto yw difeudhys.

7Y gammow krev a vydh stroethys,

ha'y gusul y honan a'n tewl dhe'n dor.

8Rag ev yw tewlys yn roes der y dreys y honan;

ev a gerdh bys yn maglenn.

9An antell a'n kemmer er an seudhel;

ha'n maglenn a sett dalghenn ynno.

10Kroglath yw kudhys y'n dor ragdho,

ha maglenn ragdho war y fordh.

11Browaghow a'n euthyk war bub tu,

ha'y helghya, ow pratha orth y dhewseudhel.

12Ahwer yw nownek ragdho,

terroes yw parys ragdho pan goedh ev.

13Dybrys vydh rannow a'y groghen,

ha kynsa-genys ankow a dheber y eseli.

14Tennys yw dhiworth an tylda a drestyas ynno,

ha dres dhe'n myghtern a vrowaghow.

15Yma tan trigys yn y dylda;

loskven yw skattrys war y annedh.

16Y wreydh yw desyghys yn-danno,

ha'y skorr a wedher a-ughto.

17Kov anodho a dhe goll dhiworth an norvys,

ha ny vydh hanow dhodho y'n stret.

18Ev yw herdhys dhiworth an golow a-berth y'n tewlder,

ha helghys yn-mes a'n bys.

19Ny vydh na agh na linyeth dhodho yn mysk y bobel,

na denvyth gesys yn y annedhow.

20Tus a'n howlsedhes a's teves marth a'y denkys,

skruth a gemmer tus a'n howldrevel.

21Yndella yth yw annedhow an dhrogoberer yn sur,

ha hemm yw tyller an den na aswonn Duw.’