Gorthyp Job dhe Bildad

1Ena Job a worthybis:

2‘Pes termyn y fynnowgh tormentya ow enev,

ha'm brewi gans geryow?

3Hwi re'm keredhis dekkweyth;

a nyns owgh methek a omsettya orthiv?

4Ha hwath mars yw gwir my dhe gammwul,

ow hammwrians a bes genev vy ow honan.

5Ha hwath mar moghhowgh agas honan er ow fynn,

ha pledya ow meth er ow fynn;

6godhvydhewgh lemmyn Duw dhe'm domhwel,

ha'm kyrghynna gans y roes.

7‘Otta, my a gri “Freudh!”, mes nyns ov klewys;

my a gri rag gweres mes nyns eus gwirvreus.

8Ev re geas ow fordh ma na allav tremena,

hag ev re settyas tewlder war ow hynsyow.

9Ev re bilyas ow glori a-dhiworthiv,

ha kemmeres an gurun dhiworth ow fenn.

10Ev a'm distru war bub tu, ha gyllys ov,

hag ev re gemmeras ow govenek yn-mes kepar ha gwydhenn.

11Ev re enowis y sorr er ow fynn,

hag ev a'm syns avel onan a'y eskerens.

12Y bagasow a dheu war-barth,

ha krugya aga gweyth-esedhva er ow fynn,

ha gul kamp a-dro dhe'm tylda.

13‘Ev re worras ow breder pell a-dhiworthiv,

ha'm kowetha yw kowl estrenhes a-dhiworthiv.

14Ow neshevin re omwithas dhiworthiv,

ha'm kowetha re'm ankovas.

15An godrigoryon y'm chi ha'm maghtethyon

a'm syns dhe vos estren.

Alyon ov vy yn aga dewlagas.

16My a elwis dhe'm gwas, ha ny'm gorthybis;

kyn y'n konjoris gans ow ganow.

17Hegas yw ow anall dhe'm gwreg,

ha flerys ov dhe'm breder ow honan.

18Fleghes yowynk ynwedh a'm kas;

pan savav i a wra ges ahanav.

19Oll ow hothmans a'm aborr

ha'n re a garen re dreylyas er ow fynn.

20Ow eskern re lenas orth ow kroghen ha'm kig,

my re skapyas gans kroghen ow dyns.

21Kemmerewgh pita orthiv, kemmerewgh pita orthiv, hwi ow howetha;

rag leuv Duw re'm tochyas.

22Prag y hwrewgh, kepar ha Duw, ow helghya,

heb kavoes lowr a'm kig?

23‘Unnweyth a pe ow geryow skrifys lemmyn!

Unnweyth a pens gravys yn lyver!

24Unnweyth a pens kervys gans pluvenn a horn ha plomm

y'n garrek bys vykken!

25Rag my a woer ow dasprenyas dhe vos yn few,

hag ev dhe sevel wortiwedh war an dor;

26ha wosa ow kroghen dhe vos distruys yndella,

hwath y'm kig my a wel Duw:

27neb a welav ow honan,

ha'm dewlagas a vir orto, a-der arall.

Ow diwloneth a glamder y'm askra.

28‘Mes mar leverowgh, “Fatell wren ni y helghya

rag y kevir gwreydhenn an mater ynno ev y honan”,

29kemmerewgh own a'n kledha,

rag sorr a dhre kessydhyansow an kledha,

hag ena hwi a woer bos breus.’