Nessa Areth Sofar

1Ena Sofar an Naamathyas a worthybis:

2‘Rakhenna ow prederow anes a'm gwra dhe worthybi,

ha hemm yw reson my dhe fyski.

3My a glew keredh a'm arvedh,

ha spyrys dres ow honvedhes a wra dhymm gorthybi.

4‘A ny wodhes hemma a-henys,

a-ban veu den settys war an norvys,

5mayth yw heudh an re dhidhuw berr,

hag unn pols byghan yw lowena an debelwas?

6Kyn ystynn y woeth bys y'n nevow,

ha'y benn a dhrehedh dhe'n kommol,

7ev a dhe goll bys vykken kepar ha'y gawgh y honan;

an dus re'n gwelas a lever, “Ple'ma ev?”

8Ev a nij dhe-ves kepar ha hunros, ha ny vydh kevys;

ev a vydh chasyes dhe-ves kepar ha gwelesigeth nos.

9Ny wra an lagas a'n gwelas y weles arta,

ha ny wra y dyller y aspia namoy.

10Y vebyon a hwila favour tus voghosek,

ha'y dhiwleuv a dhaskorr aga golusogneth.

11Y eskern yw leun a'n nerth a yowynkneth

mes henna a wrowedh ganso y'n doust.

12‘Kynth yw drogedh hweg yn y anow,

kyn y'n kudh yn-dann y daves,

13kyn na yll ev perthi y livra,

mes ev a'n with war y stevnik,

14an boes yn y golodhyon yw treylys;

venim serf yw a-berth ynno.

15Ev a lenk rychys, ha'ga hwyja arta;

Duw a's estewl dhiworth y dorr.

16Ev a sugen venim serf;

taves an nader a'n ladh.

17Ny mir ev orth an avonyow,

an livow, an goverow a vel ha kowles.

18Ev a dhaskorr frut y ober,

ha ny wra ev y lenki;

ha prow y kenwerth

ny wra ev tastya.

19Rag ev a arwaskas an voghosogyon ha'ga forsakya,

drefenn ev dhe gemmeres dhe-ves dre nerth chi na dhrehevis ev.

20‘Yn sur ny gyv ev powes a'y ewl;

ny yll skapya dhiworth y yeunadow.

21Nyns eus travyth gesys ragdho dh'y dhybri;

rakhenna ny dhur y sewena.

22Yn leunder y balster ev a vydh stroethys;

oll an nerth a anfeus a dheu warnodho.

23Wosa ev dhe lenwel y dorr

Duw a dhannvon y sorr fers warnodho,

ha gul dhodho koedha warnodho avel glaw, hag ev ow tybri.

24Ev a fi dhiworth arv a horn;

ha seth a vrons a'n gwan.

25Tennys yw hi, ha hi a dheu yn-mes a'y gorf,

an bleyn ow lughesi a dheu yn-mes a'y vystel;

browaghow a dheu warnodho.

26Tewlder kowal yw destnys rag y dresoryow;

devorys vydh gans tan nag yw gwynsellys;

go-ev an pyth yw gesys yn y dylda.

27An nevow a dhiskudh y gammweyth,

ha'n norvys a sev er y bynn.

28Kowas a-has a skub y ji dhe-ves,

dowrow ow frosa yn dydh y sorr.

29Homm yw rann den drog dhiworth Duw,

ha'n ertach apoyntys ragdho gans Duw.’