Gorthyp Job dhe Sofar

1Mes Job a worthybis:

2‘Goslowewgh gans rach orth ow geryow,

ha re bo hemma agas solas a rowgh dhymm.

3Suffrewgh my dhe gewsel;

ha wosa my dhe gewsel hwi a yll ow skornya.

4‘Ha my, yw ow krodhvol war dhen?

Prag na via troblys ow spyrys?

5Mirewgh orthiv ha bedhewgh skruthys,

ha gorrewgh agas leuv war agas ganow.

6Pan borthav kov a hemma, euthegys ov,

ha kren a ses ow hig.

7‘Prag y few an dhrogoberoryon,

ow mos ha bos koth hag ow kressya aga galloes?

8Fastys yw aga has a-dro dhedha,

ha'ga askorr a-rag aga dewlagas.

9Diagha yw aga chiow,

ha nyns usi gwelenn Duw warnedha.

10Aga tharow a dhineyth heb falladow;

gans leughi yw aga bughes, ha ny gammdhegons.

11I a dhannvon aga meppigow yn-rag kepar ha flokk,

ha'ga fleghes a derlemm.

12I a gemmer an tabourik ha'n sowtri,

ha lowenhe orth son an bib.

13I a spen aga dydhyow yn dader,

hag yn unn pols diyskynna dhe ifarn.

14I a lever dhe Dhuw, “Diberth dhiworthyn!

Nyns eus hwans dhyn a wodhvos a'th fordhow.

15Pyth yw an Ollgalloesek may koedh dhyn y servya?

ha py budh a vydh dhyn mar pysyn dhodho?”

16Mes nyns usi aga dader yn aga leuv aga honan.

Yma kusul an dhrogoberoryon pell a-dhiworthiv.

17‘Peskweyth yth yw lugarn an dhrogoberoryon difeudhys?

ha peskweyth y teu aga therroes warnedha,

an tenkys a lesrann Duw yn y sorr?

18Peskweyth yth yns kepar ha kala' a-rag an gwyns,

ha kepar ha kulyn degys dhe-ves gans an tewedh?

19Yn-medhowgh, “Duw a greun kessydhyans anewnder den rag y vebyon”.

Nansi, re bo attylys dhodho y honan, ma'n aswonno.

20Re wello aga dewlagas aga distruyans,

ha re effons sorr an Ollgalloesek.

21Rag py bern eus dhodho a-dro dh'y deylu gesys war y lergh,

pan vydh treghys dhe-ves niver y visyow?

22‘Eus nebonan a yll dyski skentoleth dhe Dhuw,

a-ban vreus ev an ughella tus?

23An eyl a verow leun y sewena,

attes ha kosel yn tien.

24Leun a vlonek yw y gorf

ha gwlygh yw mer y eskern.

25Y gila a verow hwerow y enev,

heb tastya bythkweth travyth da.

26I a wrowedh war-barth y'n doust,

ha'n kontron a wra aga hudha.

27‘Otta, my a woer agas prederow,

ha'gas towlow dhe wul kamm er ow fynn.

28Rag hwi a lever, “Ple'ma chi an pennsevik lemmyn?

Ha ple'ma an tyldow mayth esa an dhrogoberoryon trigys?”

29A ny wovynnsowgh orth tremenysi an fordhow?

A ny wrussowgh vri a'ga dustuni

30bos an drogober gwithys dhiworth dydh an distruyans,

ha bos delivrys dhiworth dydh an konnar?

31Piw a guhudh y fara dh'y fas?

Piw a'n attal rag an pyth re wrug?

32Degys dhe'n gorflann yw,

ha tus a woel war y logel.

33An gweres y'n nans yw hweg dhodho;

ha pub den oll a'n siw,

ha bush diniver a a-dheragdho.

34Fatell yllowgh ow honfortya ytho gans geryow koeg?

Nyns eus travyth gesys marnas frows yn agas gorthybow.’