Tressa Areth Elifaz

1Ena Elifaz an Temanyas a worthybis:

2‘A yll gour bos dhe les dhe Dhuw?

A yll den fur bos dhe les dhe Dhuw?

3Yw plesour dhe'n Ollgalloesek dha vos gwiryon,

po eus prow dhodho mars yw perfydh dha fordhow?

4‘Yw drefenn dha own anodho y hwra ev dha geredhi,

hag entra yn breus genes?

5A nyns yw bras dha sherewynsi,

ha heb finweth dha anewnderyow?

6Rag ty re gemmeras arwoestlow dhiworth dha vreder heb reson,

ha kibya dillas dhiworth tus, orth aga gasa noeth.

7Ny resys dowr dhe'n skwith rag eva,

ha ty re skonyas ri bara dhe'n nownek.

8An gour nerthek a berghenn an tir,

hag yma den enoradow trigys ynno.

9Ty re dhannvonas gwedhwesow dhe-ves gwag aga diwla,

ha breghow omdhivasow re beu brewys.

10Rakhenna yma antylli a-dro dhis,

hag own a wra dha euthega a-dhistowgh,

11po tewlder ma na yllydh gweles;

ha liv a dhowr a'th kudh.

12‘Yma Duw yn ughelder nev,

hag ev a vir yn-nans war an ughella ster, mar ughel dell yns.

13Ty a lever, “Pandr'a woer Duw?

A yll ev breusi der an tewlder down?

14Kommol tew a'n mayl ma na wel ev,

hag ev ow kerdhes war gylgh an nev.”

15A vynnydh pesya war an fordh goth

re drettyas gwer dhrog?

16Kibys vons kyns aga thermyn,

aga selyow skubys dhe-ves gans liv.

17I a leveris dhe Dhuw, “Gas ni yn kres!”

ha “Pandr'a yll an Ollgalloesek gul dhyn?”

18Byttegyns y feu ev neb a lenwis aga chiow a daklow da –

mes yma kusul an dhrogoberoryon pell a-dhiworthiv.

19An re wiryon a'n gwel ha lowen yns;

ha'n den ankablus a hwerth orta yn skorn.

20“Distruys yw agan eskerens,

Ha tan a lesk an remenant anedha.”

21‘Bydh akordys gans Duw hag yn kres;

dre henna dader a dheu dhis.

22Degemmer dyskans dhiworth y anow,

ha gorr y eryow y'th kolonn.

23Mar tehwelydh dhe'n Ollgalloesek ty a vydh restorys;

mar kemmerydh kammhynseth dhiworth dha dylda,

24ha dyghtya owr avel doust,

ha'n owr a Ofir yn mysk meyn an keynres,

25mars yw an Ollgalloesek dha owr

ha'th arghans drudh,

26ena ty a lowenha y'n Ollgalloesek,

ha drehevel dha fas dhe Dhuw.

27Ty a bys warnodho hag ev a'th klew,

ha ty a gollenow dha ambosow.

28Dha erviransow a vydh gwrys,

ha golow a splann war dha fordhow.

29Pan vo tus iselhes ty a lever yth yw drefenn goeth,

mes Duw a saw an den uvel y dhewlagas.

30Ev a dhelirv an gour ankablus,22:30 an gour ankablus: Amendys. Ebrow an den nag yw ankablus.

ha ty a vydh delivrys dre lander dha dhiwleuv.’