Gorthyp Job

1Ena Job a worthybis:

2‘Hedhyw ynwedh hwerow yw ow krodhvol;

Poes yw y leuv yn despit a'm hanasa.

3Unnweyth a kodhven le ma'n kaffen,

may hallen dos dh'y annedh!

4My a settsa ow hen a-dheragdho,

ha lenwel ow ganow a dhadhlow.

5My a dhys'sa an pyth a worthybsa dhymm,

ha konvedhes an pyth a lavarsa dhymm.

6A settsa er ow fynn gans y nerth bras?

Nansi; ev a woslowsa orth an pyth a lavarav.

7Ena an den ewnhynsek a allsa dadhla ganso,

ha akwitys vien bys vykken gans ow breusyas.

8‘Otta, my a dhe'n howldrehevel, mes nyns usi ev ena;

ha dhe'n howlsedhes, mes ny'n kavav;

9A-gledh pan usi ev owth oberi ny allav y dhissernya;

pan dreyl ev a-dhyghow ny'n gwelav.

10Mes ev a aswonn ow fordh vy;

mara'm proffa, gylsen vy yn-mes kepar hag owr.

11Ow throes re lenas fast orth y gammow;

my re withas y fordh heb treylya a-denewen.

12Ny dhiberthis dhiworth gorhemmynnow y dhiwweus;

my re dresoryas geryow y anow y'm askra.

13‘Mes ev a sev y honan, ha piw a yll y dreylya?

ev a wra an pyth a hwans ev.

14Rag ev a gowlwra an pyth yw apoyntys ragov;

hag yma lies tra a'n par na ganso.

15Rakhenna dyegrys ov a-dheragdho;

pan brederav, yma own dhymm anodho.

16Duw yw neb re'm digolonnas;

an Ollgalloesek re wrug euth dhymm,

17mes ny dewis yn despit dhe'n tewlder,

yn despit dhe'n duder a gudh ow fas.