Krodhvol Job

1‘Prag nag yw termynyow rag breus gwithys gans an Ollgalloesek,

ha prag na wel y dhydhyow an re a'n aswonn?

2Tus a gemmer orveyn dhe-ves;

i a beur greow re ladhsons.

3I a herdh dhe-ves asen an omdhivas;

i a gemmer ojyon an wedhwes avel arwoestel.

4I a dreyl an edhommogyon dhe denewen dhiworth an fordh;

boghosogyon an bys a omgudh war-barth.

5Otta, kepar hag asenes gwyls y'n difeyth

i a yn-rag dh'aga ober,

ow hwilas preydh y'n gwylvos

avel boes rag aga fleghes.

6I a vys yn parkow nag eus dhedha i,

ha kuntell gesigow an grappys dhiworth gwinlann tebelwas.

7I a wrowedh noeth dres an nos, heb dillas,

ha nyns eus kudhans dhedha y'n yeynder.

8Glyb yns gans glaw an menydhyow,

ha byrla an garrek drefenn fowt goskes.

9‘Tus a gib an omdhivas dhiworth an vronn,

ha kemmeres yn goestel fleghik an boghosek.

10I a gerdh a-dro noeth, heb dillas;

ha doen manalow, kynth yns i nownek;

11I a wask olew ynter fosow an terrasow,

ha trettya an gwinwaskow, mes perthi syghes.

12Dhiworth an sita tus usi ow merwel a gyn,

hag enev an dus woliys a gri rag gweres;

mes ny wra Duw vri a'ga pysadow.

13‘Yma tus a rebell erbynn an golow,

tus na aswonn y fordhow,

na pesya war y hynsyow.

14An moldrer a sev kyns dydh-tardh

may lattho an boghosek ha'n edhommek,

hag y'n nos kepar ha lader yw.

15Lagas an avoutrer a worta an tewlwolow,

ow leverel, “Ny wra lagas vyth ow aspia”;

hag ev a doellwisk y fas.

16Y'n tewlder i a bal der an chiow,

mes y'n jydh i a worta a-ji;

ny aswonnons an golow.

17Rag tewlder down yw myttin dhedha i oll;

kowetha yns dhe vrowaghow tewlder down.

18‘Yn-medhowgh, “Skav yw ev war enep an dowrow;

milliges yw aga rann y'n tir

ny dreyl trettyer dhe'n gwinlannow.

19Dell wra syghor ha toemmder kibya dhe-ves dowrow an ergh,

yndella y kib ifarn an dus re beghas.

20An dorr a'n ankev,

hweg yw dhe'n gontron;

ny berthir kov anodho na fella;

ytho kammhynseth yw terrys kepar ha gwydhenn.”

21‘I a debeldhyght an venyn gownagh hag anvap,

ha ny wrons da dhe'n wedhwes.

22Mes Duw a denn tus alloesek dhe-ves der y nerth;

ev a sev, ha nyns yw denvyth sur a'y vewnans.

23Ev a re dhedha diogeledh, ha skoedhys yns;

mes yma y dhewlagas war aga fordhow.

24Ughelhes yns pols, hag ena gyllys;

iselhes yns, hag i a wedher kepar ha'n malow,24:24 malow: Amendys war-lergh an Septuagint.

ha treghys kepar ha pennow greun.

25‘Mar nyns yw yndella, piw a brev ow bos gowleveryas,

ha diskwedhes bos ow geryow travyth?’