Gorthyp Job

1Ena Job a worthybis:

2‘Assa weressys an dus heb nerth!

Assa sawsys an vregh heb krevder!

3Pana gusul re brofsys dhe dhen heb furneth,

ha diskwedhes dhodho palster a dhoethter!

4Piw a lostleveris dhodho an geryow ma?

Ha piw re dheuth y spyrys a-dhiworthis?

5‘Spyrysyon an re varow a-woeles a gren,

an dowrow ha'n re yw trigys ynna.

6Noeth yw ifarn a-rag Duw,

Abaddon yw heb kudhans.

7Ev a ystynn ebron an kledh a-ugh an wagva,

hag ev a greg an bys war dravyth.

8Ev a vayl an dowrow yn y gommol tew,

ha nyns yw an gommolenn folsys yn-danna.

9Ev a gudh enep an loer leun,

hag a ystynn y gommol warnedhi.

10Ev a worras an worwel war enep an dowrow,

orth an or yntra golow ha tewlder.

11Kolovenyow nev a gren,

ow perthi marth drefenn y geredh.

12Ev a goselhas an mor der y nerth;

der y dhoethter ev a vrewis Rahab.26:12 Rahab: Euthvil morek.

13Der y anall an nevow eth ha bos teg;

y dhorn a wanas an sarf slynk.

14Ha nyns yw an re ma marnas emlow y fordhow;

hag ass yw isel an hwystrenn a glewyn anodho!

Piw a yll konvedhes taran y nerth?’