Job a With y Lander

1Job a gemmeras y areth yn-bann arta, ow leverel:

2‘Dell vew Duw, neb re gemmeras dhe-ves ow gwirvreus,

ha'n Ollgalloesek, neb re wrug dhe'm enev bos hwerow,

3hedre vo anall ynnov

hag yma spyrys Duw y'm dewfrik,

4ny gews ow diwweus anewnder,

ha ny lever ow thaves toell.

5Pell bedhes dhiworthiv leverel agas bos ewn;

bys pan dremenniv ny naghav ow glander.

6My a syns fast ow gwiryonsys ha ny'n gasav nevra;

ny wra ow holonn ow heredhi hedre viv yn few.

7‘Re bo ow eskar kepar ha'n drogoberer,

ha re bo ow erbynner kepar ha'n tebelwas.

8Rag py govenek eus dhe'n drogoberer pan yw treghys dhe'n dor,

pan gemmer Duw y vewnans dhe-ves?

9A wra Duw klewes y gri

pan dheu ahwer warnodho?

10A wra ev kavoes delit y'n Ollgalloesek?

A wra ev pysi Duw pup-prys?

11‘My a'gas dysk a-dro dhe leuv Duw;

ny gudhav an pyth usi gans an Ollgalloesek.

12Otta, hwi oll re welas hemma agas honan;

prag y kewsewgh ytho kemmys flows?

13‘Homm yw rann an drogoberer gans Duw,

ha'n ertach a dhegemmer turans dhiworth an Ollgalloesek:

14Mars yw lieshes y fleghes, yth yw rag an kledha;

ha dh'y askorr nyns eus lowr dhe dhybri.

15An re yw gesys a vydh dres dhe'n bedh gans an pla,

ha ny vydh gwedhwesow owth oela ragdha.

16Kyn krug ev arghans kepar ha'n doust,

ha darbari dillas kepar ha pri,

17an pyth a grug ev an den gwiryon a'n gwisk,

ha'n den ankablus a gevrenn an arghans.

18An chi a dhrehav yw kepar ha gwias kevnis,27:18 kepar ha gwias kevnis: Ow siwya an Syriek. Ebrow kepar ha goedhan.

kepar ha krow gwrys gans goelyador.

19Ev a wrowedh gans rychys, mes ny wra henna na fella;

pan iger y dhewlagas gyllys yw pup-tra oll.

20Browaghow a dheu dresto kepar ha liv;

korwyns a'n kib dhe-ves y'n nos.

21Gwyns an est a'n drehav ha gyllys yw ev;

ev a'n hwyth yn-mes a'y le,

22ha hurlya er y bynn heb truedh;

hag ev a fi dhe'n fo dhiworth y nerth.

23An gwyns a dak y dhiwla er y bynn yn ges

ha hwibana orto yn-mes a'y le.