Hwilas Furneth

1‘Yma bal rag arghans,

ha tyller may ma owr purhes.

2Horn yw kemmerys dhiworth an dor,

Ha teudhys yw kober dhiworth an moen.

3Den a re diwedh dhe'n tewlder,

ha hwilas moen y'n pella bounds

yn duder ha tewlder down.

4Pell dhiworth annedhow tus ev a iger shafta,

yn tylleryow ankevys gans troes den;

pell dhiworth tus i a greg ha leska.

5An dor, may teu bara dhiworto,

yw treylys a-woeles kepar ha gans tan.

6Saffirow a dheu dhiworth y veyn,

hag yma dhodho doust a owr.

7‘Ny aswonn edhen-breydh vyth an hyns na,

ny'n gwelas lagas falghun.

8Ny stankyas bestes prout warnodho;

ha ny dremenas lew vyth a-ughto.

9‘Leuv yw settys dhe'n kellester,

ha domhwel menydhyow der an gwreydh.

10Ev a dregh gwythiennow y'n karregi,

ha'y dhewlagas a wel gemmow drudh a bub eghenn.

11Ev a wra argeow y'n goverow ma na deverons;

ha'n pyth yw kudhys ev a dhre dhe'n golow.

12‘Mes ple kevir furneth?

Ha ple'ma tyller konvedhes?

13Ny gonvedh den hy thalvosogeth,

ha ny yll bos kevys yn tir an re vew.

14An downder a lever, “Nyns usi ynnov”,

ha'n mor a lever, “Nyns yw genev.”

15Ny yll bos prenys gans owr,

ha ny yll hy fris bos poesys yn arghans.

16Ny yll bos prenys gans an owr a Ofir,

gans onyks drudh na saffir.

17Nyns yw naneyl owr na gwrys hy far,

na ny yll bos keschanjyes rag tegennow a owr.

18Ny vydh naneyl koral na gwrys menegys;

pris furneth yw dres perlys.

19Ny yll topaz Kush bos kehevelys dhedhi;

ny yll bos prenys gans owr pur.

20‘Py le y teu furneth dhiworto?

Ha ple'ma tyller konvedhes?

21Kudhys yw rag dewlagas pup-tra a vew,

ha kelys rag ydhyn an ayr.

22Abaddon hag Ankow a lever,

“Gans agan diwskovarn ni re glewas son anodho.”

23‘Duw a gonvedh an hyns dhedhi,

hag ev a woer hy thyller,

24rag ev a vir dhe bennow an norvys,

ha gweles pup-tra yn-dann an nevow.

25Pan ros ev dhe'n gwyns y boester,

ha kevrenna an dowrow gans musur;

26pan wrug ev ordenans rag an glaw,

ha hyns rag an taran ha'n lughes;

27ena ev a viras orti ha'y disklerya;

ev a's fastyas ha'y hwilas.

28Hag ev a leveris dhe vab-den,

“Otta, own an Arloedh – furneth yw henna;

ha skonya drog yw konvedhes.” ’