Job a Worfenn y Dhefens

1Job a gemmeras y areth yn-bann arta, ow leverel:

2‘A pen vy kepar hag y'n misyow tremenys,

kepar hag y'n dydhyow pan witha Duw warnav,

3pan splanna y lugarn a-ugh ow fenn,

ha der y wolow y kerdhyn dre dewlder;

4pan en vy yn dydhyow ow yowynkneth,

pan esa Duw ow kwitha29:4 ow kwitha: Ow siwya an Syriek ha'n Septuagint. war ow thylda;

5pan esa an Ollgalloesek hwath genev,

hag yth esa ow fleghes a-dro dhymm;

6pan o ow hammow golghys gans leth,

ha'n garrek a dhevera ragov goverow a oyl!

7‘Pan en yn-mes dhe yet an sita,

ha pareusi ow esedh y'n plen,

8tus yowynk a'm gweli ha kildenna,

ha tus koth a sevi a'ga sav;

9pennsevigyon a skonya kewsel,

hag a worra aga leuv war aga ganow;

10tewys o levow ugheloryon,

ha'ga thaves a lena orth aga stevnik.

11Pubonan a glewo ahanav a leveri ow bos gwynnvys,

ha pub lagas a'm gweli a dhegi dustuni da a-dro dhymm,

12drefenn my dhe sawya an boghosek esa ow kria rag gweres,

ha'n omdhivas na'n jevo gwereser.

13An dus esa ow merwel a'm benniga,

ha my a wre dhe golonn an wedhwes kana.

14My a omwiska yn gwirvreus hag ev a'm gwiska;

ow gwirvreus o avel pows ha tulyfant.

15Dewlagas en rag an dall,

ha dewdroes rag an evredh.

16Tas rag an voghosogyon en,

ha my a skoedhya ken an den na aswonnyn.

17My a derri diwen an dhrogoberer,

ha gul dhodho gasa y breydh dhe goedha dhiworth y dhyns.

18Ena yn-medhav, “My a dremen y'm neyth ow honan,

ha my a ynkress ow dydhyow kepar ha'n tewes;

19ow gwreydh a ystynn dhe'n dowr,

ha'n gluth a wrowedh war ow skorrow dres an nos;

20ow glori a vydh fresk ynnov,

an warak pup-prys nowydh y'm leuv.”

21‘Tus a woslowi orthiv ha gortos,

ow tewel rag ow husul.

22Wosa my dhe gewsel ny gewsens namoy;

ow geryow a devera warnedha.

23I a'm gorta kepar ha glaw;

igerys aga ganow kepar ha rag an glaw yn gwenton.

24Pan vinhwerthyn dhedha, skant ny'n krysens,

ha ny vynnsens kelli golow ow fas.

25My a dhewisi an fordh ragdha ha my a esedha avel chyf,

ha my a's ledya avel myghtern yn kres y lu,

kepar ha den a re konfort dhe gynoryon.