Krodhvol Job

1Wosa hemma Job a igoras y anow ha milliga dydh y dhineythyans. 2Ha Job a leveris:

3‘Res ello dhe goll an jydh hag ynno y feuv dineythys,

ha'n nos a leveris,

“Omdhegys yw flogh gorow.”

4Bedhes an jydh na tewlder;

na wrello Duw y hwilas a'n ughelder,

ha na splannes golow warnodho.

5Perghennes e tewolgow ha tewlder down.

Triges kommol warnodho;

gwres euth dhodho duder an jydh.

6An nos na – sesyes hi tewlder tew!

Na lowenhes yn mysk dydhyow an vlydhen;

na dhes a-berth yn niver an misyow.

7Devri, bedhes an nos na anvap;

na vedhes garm heudh klewys ynni.

8Milligens hi an re a villik an jydh,

neb a woer gul Leviathan dhe dhifuna.

9Bedhes tewel ster hy bora;

gwaytyes golow heb y gavoes vyth;

ha na weles kreghyn lagas an myttin,

10drefenn na dhegeas darasow torr ow mamm,

na kudha trobel dhiworth ow dewlagas.

11‘Prag na verwis y'n dorr,

dos yn-rag dhiworth an dorr ha tremena?

12Prag y'm degemmeras an dhewlin,

po an dhiwvronn, may hallen dena?

13Rag ena my a wrowedhsa ha bos kosel,

my a gosksa, ena my a via yn powesva

14gans myghternedh ha konseloryon an norvys

a dhastrehevis magoryow ragdha aga honan,

15po gans pennsevigyon a's tevo owr,

a lenwis aga chiow a arghans.

16Po prag na veuv kudhys kepar ha flogh genys marow,

kepar ha fleghigyow na welsons golow?

17Ena an debeles a hedh trobla,

hag ena yma an re skwith yn powesva.

18Ena yma an brisnoryon attes war-barth;

ny glewons an lev a vester kethneth.

19Yma byghan ha bras ena,

ha rydh yw an kethwas dhiworth y vester.

20‘Prag yth yw golow res dhe'n den truan,

ha bewnans dhe'n dus hwerow aga enev,

21hag a's tevydh hwans a vernans, mes ny dheu,

ha palas ragdho moy ages rag tresoryow kudhys;

22neb a lowenha yn feur,

hag yw heudhik pan gevons an bedh?

23Prag yth yw golow res dhe wour, kudhys y hyns,

may hwrug Duw keas a-dro dhodho?

24Rag ow hanasow a dheu yn le ow bara,

ha diverys yw ow hynvannow kepar ha dowr.

25Rag an dra a'm beus own anodho a dheu warnav,

ha'n pyth a dhoutyav a dheu dhymm.

26Nyns ov attes, ha nyns ov kosel;

nyns eus powesva dhymm; mes trobel a dheu.’