1‘Mes lemmyn i a'm skorn,

tus yowynka agesov,

may skornsen gorra aga thasow

gans keun ow flokk.

2Py gwayn a veu krevder diwla aga thasow dhymm,

tus may feu gyllys aga nerth?

3Gwann der edhomm ha nown

i a gni an tir sygh ha difeyth,

4i a guntell malow ryb an prysk,

ha gwreydh banadhel yw aga boes.

5Herdhys dhiworth tus yns;

tus a arm orta kepar dell yns ladron.

6Res yw dhedha triga yn nansow an keynresyow,

yn tell a'n dor ha'n karregi.

7Begi a wrons yn mysk an prysk;

hag omguntell yn-dann an linas.

8Mebyon goeg ha vil,

i re beu tewlys yn-mes a'n tir.

9‘Ha lemmyn i a wra ges ahanav gans kanow;

ger ges ov dhedha.

10I a'm aborr, i a ombellha dhiworthiv;

ha ny skonyons trewa orth ow fas.

11Drefenn Duw dhe lewsel ow hordenn ha'm uvelhe,

i a dewl fronn a-denewen ha my ena.

12A'n barth dhyghow dhymm an routh a sev;

i a'm herdh yn-rag,

hag i a grug aga gweythyow-esedhva er ow fynn.

13I a dhiswra ow hyns;

i a sewen orth ow distrui

heb edhomm a weres.

14I a dheu yn-rag kepar ha der aswa ledan;

yn mysk an radellow i a rol a-bervedh.

15Browaghow yw treylys warnav;

ow dynita yw chasyes dhe-ves kepar ha gans an gwyns,

ha'm govenek a selwyans a dremen kepar ha kommolenn.

16‘Ha lemmyn ow enev a dhever dhe-ves;

dydhyow a alar re'm synsis.

17Y'n nos ow eskern yw gwenys a-ji dhymm,

ha ny bowes an payn a'm kni.

18Ev a ses ow dillas30:18 Ev a ses ow dillas: ow siwya an Septuagint. Ebrow Ow dillas yw dihevelebys. gans freudh;

ev a'm kelm er konna ow mantell.

19Duw re'm tewlis y'n leys,

ha my res eth ha bos kepar ha doust ha lusu.

20My a gri dhis rag gweres, mes ny worthybydh orthiv;

my a sev, ha ny wredh vri ahanav.

21Ty re dreylyas yn fell er ow fynn;

gans krevder dha leuv ty a omsett er ow fynn.

22Ty a'm drehav yn-bann gans an gwyns,

ha'm tewlel a-dro y'n tewedh.

23My a woer ty dhe'm dri dhe'n mernans,

ha dhe'n chi apoyntys rag pub den bew.

24‘Yn sur denvyth ny ystynn y leuv erbynn den trogh

pan gri rag gweres yn y anken.

25A ny oelis a-barth an den anfeusik?

A ny veu ow enev trist rag an boghosek?

26Mes pan feu dhymm govenek a dader, drog a dheuth;

pan waytis golow, tewlder a dheuth.

27Bryjyon a wra ow holodhyon heb powes;

dydhyow a alar a dheu er ow fynn.

28Yth av a-dro duhes, a-der gans an howl;

my a sev y'n guntellva ha kria rag gweres.

29Broder ov a owrgeun,

ha keskoweth a strusyow.

30Ow kroghen a dhuha warnav,

ha'm eskern a lesk gans fevyr.

31Treylys dhe gyni yw ow sowtri,

ha'm pib dhe lev an re a oel.