1‘My re wrug kevambos gans ow dewlagas,

na virsen yn unn hwansa orth gwyrghes.

2Pyth a via ow rann dhiworth Duw a-vann,

ha'm ertach dhiworth an Ollgalloesek yn ughelder?

3A nyns yw anfeusi rag an dhrogoberer,

terroes rag an re a wra droktra?

4A ny wel ev ow fordhow,

ha nivera ow hammow oll?

5‘Mar kerdhis gans falsuri,

po mar fistenas ow throes dhe doell –

6re biv poesys yn mantol a ewnder,

hag ena Duw a woer ow bos divlam –

7mar treylis ow hamm a-denewen dhiworth an fordh,

mars eth ow holonn war-lergh ow dewlagas,

po mar lenas namm dhe'm diwleuv;

8ena gas my dhe hasa, ha den arall y dhybri;

ha re bo ow threvas diwreydhys.

9‘Mar pe ow holonn dynys gans benyn,

po mar skolkyen ryb daras ow hentrevek,

10ena re vallo ow gwreg rag den arall,

ha re kosko gwer erell gensi.

11Rag henna a via tra vethus,

kammweyth dhe vos breusys;

12henna y fia tan ow leski bys yn Abaddon

hag ev a leska ow askorr bys y'n gwreydhyow.

13‘Mar skonnyen gwirvreus dhe'm gwas ha'm maghteth,

pan esa gansa grevons er ow fynn,

14pandr'a wrav pan wra Duw sevel yn-bann?

pandr'a worthybav pan y'm hwither?

15A ny wrug ev neb a'm gwrug vy y'n dorr, aga gul i ynwedh?

Hag a ny wrug an keth Duw agan formya y'n brys?

16‘Mar skonis hwansow an voghosogyon,

po gul dhe dhewlagas an wedhwes fyllel,

17po dybri ow themmik ow honan,

heb y gevrenna gans an omdhivas

18(mes dhiworth ow yowynkneth my a'n maga kepar dell wra tas –

ha my a'n ledyas dhiworth brys y vamm);

19mar kwelis nebonan ow mos dhe goll drefenn fowt a dhillas,

po den edhommek heb kudhans;

20mar ny wrug y dhiwglun ow benniga,

ha mar ny ve toemmhes gans knew ow deves;

21mar trehevis ow leuv erbynn an omdhivas,

drefenn bos genev delanwes y'n lys,31:21 drefenn bos genev delanwes y'n lys: Ebrow drefenn my dhe weles ow gweres y'n yet.

22ena re goettho ow bregh dhiworth ow skoedh,

ha re bo terrys orth an mell.

23Rag yth esa euth dhymm a derroes dhiworth Duw,

ha drefenn y ryelder ny yllyn gul henna.

24‘Mar korris ow fydhyans yn owr,

po leverel dhe owr, “Ow diogeledh os”;

25mar lowenhis drefenn bos meur ow golusogneth,

po drefenn ow leuv dhe waynya meur;

26mar miris orth an howl ow splanna,

po orth an loer ow kerdhes yn golewder,

27may feu ow holonn dynys yn-dann gel,

ha'm leuv a offras dhedha amm a omaj;31:27 ha'm leuv a offras dhedha amm a omaj: Ebrow ha'm leuv a ammas dhe'm ganow.

28hemma ynwedh a via kammweyth dhe vos breusys,

rag my a via dislen dhe Dhuw y'n ughelder.

29‘Mar lowenhis drefenn anfeus ow eskar

po bos heudh pan wrug drog y gavoes

30(ny ros vy kummyas dhe'm ganow dhe begha

dre bysi y vewnans gans molleth);

31mar ny leveris tus ow thylda,

“Piw eus na veu lenwys a'y gig?”

32(ny ostyas estren y'n stret,

mes my re igoras ow daras dhe'n tremenyas);

33mar kelis ow hammweythresow dell wra mab-den,

ow kudha ow sherewneth yn ow askra,

34drefenn bos own dhymm a'n routh vras,

ha bismer an teyluyow a'm euthega,

may tewis ha nyns en yn-mes –

35unnweyth a pe nebonan dhe'm klewes!

Ottomma ow sinans! – re worthyppo dhymm an Ollgalloesek;

re wrello ow kuhudhor skrifa ow kuhudhans!

36Yn sur my a'n degsa war ow skoedh;

my a'n kolmsa dhymm kepar ha kurun;

37my a dhisklersa dhodho oll kovadh ow bewnans

ha dos nes dhodho kepar ha pennsevik.

38‘Mar kriis ow thir er ow fynn,

ha'y fynnglow re oelas war-barth;

39mar tybris y askorr heb talas,

po terri spyrys y wonedhysi;

40re teffo spern yn le gwaneth,

hag ivra yn le heydh.’

Geryow Job a worfenn.