Elihu a Geredh Job

1‘Mes lemmyn klew ow geryow, Job,

ha goslow orth pup-tra a lavarav.

2Otta, my a iger ow ganow;

an taves y'm ganow a gews.

3Ow geryow a dheu dhiworth ewnhynseth ow holonn,

ha'm diwweus a lever yn apert an pyth a wonn.

4Spyrys Duw re'm gwrug,

hag anall an Ollgalloesek a re dhymm bewnans.

5Gorthyp dhymm, mar kyllydh;

sett dha eryow a-dheragov ha sav yn-bann.

6Yth ov kepar ha ty a-dherag Duw;

my ynwedh re beu gwrys a bri.

7Ny dal own ahanav dha euthega;

ny wrowedh ow leuv yn poes warnas.

8‘Yn sur, ty re gewsis y'm diwskovarn,

my re glewas son an geryow –

9“Pur ov, heb treuspass;

glan ov, ha heb anewnder.

10Mes otta, yma dhodho arvreus er ow fynn,

ev a'm reken avel eskar;

11ev a worr ow dewdroes y'n stokkys,

hag ev a aspi orth oll ow hynsyow.”

12‘My a worthyp dhis, yn hemma nyns os ewn;

rag brassa yw Duw ages mab-den.

13Prag y strivydh er y bynn,

rag ny yll denvyth gorthybi dhe oll y eryow?

14Rag Duw a gews yn unn fordh, hag ena yn arall,

kyn na wra den vri a henna.

15Yn hunros, yn gwelesigeth a'n nos,

pan goedh kosk down war dus,

hag i ow koska yn aga gweli,

16ena ev a iger aga diwskovarn

ha'ga ownekhe gans gwarnyansow,

17rag treylya den dhiworth drogober,

ha'y witha rag goeth.

18Ev a saw y enev rag an pytt,

ha'y vewnans rag treusi an avon.

19Po chastiys yw den dre bayn war y weli,

gans strif yn y eskern pup-prys,

20may hwra y vewnans kasa bara,

ha'y enev a gas boes denti.

21Y gig yw gwastys dhe-ves ma na yll bos gwelys;

ha'y eskern, a veu anweladow kyns, yw lommhes.

22Y enev a dheu nes dhe'n pytt,

ha'y vewnans dhe'n re a dhre ankow.

23Mars eus el rybdho,

medhador, onan yn mysk mil,

rag disklerya dhe dhen an pyth yw ewn ragdho,

24ha mars yw grassyes orto ha leverel,

“Gwith e rag mos war-nans dhe'n pytt;

my re gavas ronson ragdho:

25ena y gig a vydh krev kepar ha kig maw;

ev a dhehwel dhe dhydhyow y yowynkneth.”

26‘Ena ev a bys war Dhuw ha kavoes favour ganso,

ev a wel fas Duw gans lowena,

ha Duw a attal dhodho y ewnder.

27Ev a gan a-rag dus ha leverel,

“My re beghas ha kammdreylya an pyth a veu ewn,

mes ny dhegemmeris an pyth a dhendilis.

28Ev a dhelirv ow enev rag mos y'n pytt,

ha'm bewnans a wel an golow.”

29‘Duw a wra oll an taklow ma

diwweyth, teyrgweyth, gans gour,

30rag dri y enev arta dhiworth an pytt,

may hallo golow bewnans splanna warnodho.

31Gwra vri, a Job, goslow orthiv;

taw ha my a gews.

32Mar mynnydh leverel neppyth, gorthyp dhymm;

kows, rag my a vynn diskwedhes dha vos ankablus.

33Poken, goslow orthiv;

Taw ha my a wra dyski furneth dhis.’