Nessa Areth Elihu

1Ena Elihu a leveris:

2‘Klewewgh ow geryow, hwi dus fur,

ha goslowewgh orthiv, hwi dus skentel;

3rag an skovarn a brev geryow

kepar dell vlas an stevnik boes.

4Gwren dewis an pyth yw ewn;

Gwren dyski yntredhon an pyth yw da.

5‘Job re leveris, “Ankablus ov,

mes Duw re gemmeras dhe-ves ow gwirvreus;

6kynth ov ewn, breusys ov avel gowek;

ny yll ow goli bos yaghhes, kynth ov heb kammweyth.”

7Py gour yw kepar ha Job,

a yv skorn kepar ha dowr?

8Kowethya a wra gans drogoberoryon

ha kerdhes gans an debeles.

9Rag ev re leveris, “Ny gyv gour prow

pan assay ev plegya dhe Dhuw.”

10‘Rakhenna goslowewgh orthiv, hwi wer a gonvedhes,

pell bedhes dhiworth Duw ev dhe wul drog,

dhiworth an Ollgalloesek ev dhe wul kamm.

11Ev a attal dhe dhen an pyth re wrug,

hag a surha gour dhe gavoes an pyth re dhendilas.

12Yn gwiryonedh ny wra Duw travyth yn trog,

ha ny wra an Ollgalloesek kammdreylya gwirvreus.

13Piw a'n settyas war an norvys?

Piw a ros dhodho charj war an bys oll?

14Mar treyllya y golonn dhodho y honan,

ha kuntell dhodho y spyrys ha'y anall,

15galsa oll kig dhe goll war-barth,

ha mab-den a dreylsa arta dhe dhoust.

16‘Mars eus konvedhes dhis, klew hemma;

goslow orth an pyth a lavarav.

17A yll governa neb a gas gwirvreus?

A vynnydh y dhampnya neb yw gwiryon ha galloesek,

18a lever dhe vyghtern, “Koeg os!”

ha dhe ugheloryon, “Tebel owgh”;

19neb na dhiskwa faverans dhe bennsevigyon,

ha na faver an wolusogyon moy es an voghosogyon,

drefenn i oll dhe vos ober y leuv?

20I a verow yn pols, yn kres an nos;

shakys yw an bobel hag i dremen dhe-ves,

ha kemmerys dhe-ves yw an alloesogyon heb leuv densys.

21‘Rag yma y dhewlagas war fordhow gour,

hag ev a wel y gammow oll.

22Nyns eus tewolgow na tewlder down

may hallo drogoberoryon omgudha.

23Ny worras Duw termyn apoyntys rag gour,

dhe vos a-dheragdho rag breus.

24Ev a vrew an alloesogyon heb hwithrans,

hag a sett re erell yn-bann yn aga le.

25Drefenn ev dhe aswonn aga oberow,

ev a's domhwel y'n nos, ha skwattys yns.

26Ev a's gwysk drefenn aga drogober

yn tyller may hyll tus y weles,

27drefenn i dhe dreylya dhiworth y siwya,

ha ny wrussons vri a'y fordhow.

28I a wrug dhe gri an voghosogyon dos dhodho,

may klewas ev kri an dus truan.

29‘Mes pan yw ev tawesek, piw a'n dampen?

Pan gudh ev y fas, piw a'n aspi?

Mes yma ev a-ugh kenedhel hag a-ugh densys,

30dhe lettya den ansans rag governa,

rag settya antylli rag an bobel.

31‘Mar leverir dhe Dhuw,

“My re borthas kessydhyans; ny dreuspassav moy;

32dysk dhymm an pyth na welav;

mar kammwrug vy, ny'n gwrav namoy.”

33Desevos a wre'ta ev dhe dyli dhis,

ha ty orth y skonya?

Res yw dhiso jy ervira, a-der my;

rakhenna diskler an pyth a wodhes.

34Gwer a gonvedhes a lever dhymm,

ha gour fur neb a glew a lever dhymm,

35“Job a gews heb godhvos,

ha heb furneth yw y eryow.”

36Unnweyth a pe Job prevys bys y'n gorfenn,

rag ev dhe worthybi kepar ha gwer dhrog.

37Ev a geworr rebellyans dh'y begh;

ev a dak diwleuv yn agan mysk,

ha lieshe y eryow erbynn Duw.’