Tressa Areth Elihu

1Ena Elihu a leveris:

2‘A brederydh bos hemma ewn?

Ty a lever, “Ankablus ov a-dherag Duw.”

3Mar kovynnydh orto, “Py les eus dhymm,

ha pandr'a waynyav mar ny beghav?”

4my a worthyp dhis

ha dhe'th kowetha usi genes.

5Mir war-vann orth an nevow ha gwel;

aspi orth an kommol yw ughella agesos.

6Mar peghsys, pandr'a wredh er y bynn?

Mars yw lies dha gammweythresow, pandr'a wra henna dhodho?

7Mars os gwiryon, pandr'a redh dhodho;

po pandr'a dhegemmer ev dhiworth dha leuv?

8Ny wra dha sherewynsi tochya marnas gour kepar ha ty,

ha ny doch dha ewnder marnas mebyon tus.

9‘Tus a gri drefenn an lies arwask;

i a gri rag gweres drefenn bregh an alloesogyon.

10Mes ny lever denvyth, “Ple'ma Duw, ow Gwrier,

neb a re kanow y'n nos,

11neb a dhysk dhyn moy ages bestes an norvys,

ha gul dhyn bos furra ages an ydhyn y'n ayr?”

12I a gri, mes ny worthyp ev,

drefenn goeth drogoberoryon.

13Yn sur ny glew Duw kri gwag,

ny wra an Ollgalloesek vri anodho.

14Pyseul dhe le, ytho, y hwoslow

pan leverydh na yllydh y weles,

bos an ken dheragdho

ha ty dhe vos orth y wortos.

15Ha lemmyn drefenn na wra y sorr kessydhya

ha ny wra ev vri a follneth,

16Job a iger y anow gans kows gwag

ha heb godhvos ev a liesha geryow.’