An ARLOEDH a Gews

1Ena an Arloedh a worthybis dhe Job dhiworth an korwyns:

2‘Piw yw hag a dewlha ow husul gans geryow heb godhvos?

3Grogys dha dhiwglun kepar ha gour;

my a wovynn orthis ha ty a lever dhymm.

4‘Ple'th eses pan settis vy sel an norvys?

Lavar dhymm, mars eus konvedhes dhis.

5Piw a erviras y vraster? Ty a woer, yn sur!

Piw a ystynnas kordenn-vusura warnodho?

6Pyth esa y selyow sedhys warnodho?

po piw a dhesedhas y bennmen –

7ha ster an myttin ow kana war-barth

hag oll mebyon Duw ow karma gans lowena?

8‘Piw a dhegeas an mor a-dryv darasow

pan dardhas ev dhiworth an dorr? –

9pan wrug vy dhe gommol bos y dhillas,

ha'y vaylya yn tewlder tew,

10ha ragsettya finwethow ragdho,

ha gorra barrys ha darasow,

11pan leveris vy, “Ty a yll dos bys omma mes na fella,

ha dha vordonnow goethus a vydh lettys omma”?

12‘A resys gorhemmynnow dhe'n myttin yn oll dha vewnans,

po diskwedhes dhe'n bora y dyller,

13may hallo ev synsi an norvys der y emlow,

ha shakya an dhrogoberoryon a-dhiworto?

14Chanjys yw kepar ha pri yn-dann sel,

ha liwys yw kepar ha dillas.

15Skonys yw an golow dhiworth an dhrogoberoryon,

ha terrys yw aga bregh dhrehevys.

16‘A entersys bys yn fentynyow an mor,

po kerdhes yn downder an mor?

17A veu porthow ankow diskwedhys dhis?

A welsys porthow an tewlder down?

18A gonvedhsys ledander an norvys?

Lavar dhymm mar kodhes oll hemma.

19‘Ple'ma'n fordh dhe drigva an golow?

Ha ple'ma tyller an tewlder?

20A yllydh aga gorra yn aga oryon?

A aswonnydh an hynsyow dh'aga chiow?

21Ty a woer, drefenn dha vos genys ena,

ha bras yw niver dha dhydhyow!

22‘A entersys yn gwithvaow an ergh,

po gweles gwithvaow an keser

23a withis vy rag termyn trobel,

rag dydhyow a vatel ha bresel?

24Ple'ma'n fordh dhe'n tyller mayth yw golow lesrynnys,

po le mayth yw gwyns an howldrevel keskerys war an norvys?

25‘Piw re droghas kanel rag livow an glaw,

ha hyns rag an taran ha'n lughes,

26rag dri glaw dhe dir ma nag eus trigys gour vyth,

dhe dhifeythtir ma nag eus den,

27rag dowrhe difeyth ynyal,

ha gul dhe'n tir dyllo gwels?

28‘Eus tas dhe'n glaw?

Piw a dhineythis an bannaghow a luth?

29Dhiworth torr piw y teuth an yey yn-mes?

Piw a dhineythis an rew dhiworth an nevow

30a wra dhe'n dowrow bos mar gales avel men,

ha rewi enep an downvor?

31‘A yllydh kelmi kadonyow an Pleyades?

A yllydh lowsya kadonyow Orion?

32A yllydh dri yn-mes toknys an stergylgh yn aga sesonyow

po a yllydh ledya an Ors gans y gelyn?

33A wodhes ordenansow nev?

A yllydh settya aga rewl war an norvys?

34‘A yllydh drehevel dha lev dhe'n kommol,

ma'th kuttho liv a dhowrow?

35A yllydh dyllo tardhow lughes, mayth ellons

ha leverel dhis, “Yth eson omma”?

36Piw a worras furneth y'n kommol,38:36 y'n kommol: Styr an ger ebrow yw ankler; martesen an ibis..

po piw a ros konvedhes dhe'n niwl?38:36 niwl: Styr an ger ebrow yw ankler; martesen an kulyek.

37Piw a'n jeves an furneth rag nivera an kommolennow,

po piw a yll domhweles sethow dowr an nevow,

38pan yw an doust kaleshes avel alkan teudhys,

ha'n gweres a len war-barth yn pellennow?

39‘A yllydh helghya preydh rag an lowarn,

ha gwalgha ewl an lewyon yowynk,

40hag i ow plattya yn aga fow,

po kontrewaytya yn prysk?

41Piw a bareus an preydh rag an vran-vras,

pan gri hy fleghes orth Duw,

ha gwandra a-dro drefenn fowt a voes?