1‘A wodhes p'eur tineyth gever an karregi?

A welydh an ewigow ow tineythi?

2A yllydh nivera an misyow may tegons aga helyn

hag a wodhes an termyn may tineythons?

3I a blatt ha dyllo aga askorr

ha delivra aga fleghes.

4Aga fleghes a ha bos krev y'n powdir;

i a dhiberth ha ny dhehwelons dhedha.

5‘Piw a asas dhe'n oneger mos dhe wari?

Piw a dhigolmas rawyow an asen gwyls?

6My a ros dhodho an difeythtir rag y drigva,

ha'n hoelanek rag y annedh.

7Ev a hwerth orth habadoellya an sita;

ny glew ev kri an lewyer.

8Ev a wander y'n menydhyow avel y beurva,

ha hwilas glasneth oll.

9‘A vynn an ojyon gwyls dha servya?

A wra ev gortos ryb dha bresep nosweyth?

10A yllydh y synsi dhe'n fynngel gans herness?

A wra ev kloesya an nansow war dha lergh?

11A yllydh fydhya ynno drefenn y grevder,

ha gasa dhodho dha lavur poes?

12A yllydh fydhya ynno dhe dhehweles

ha dri an greun dhe'th leur-drushya?

13‘Eskelli an strus a flapp yn lowen,

mes ny nij strus mar dha avel hwibon.

14Hi a as hy oyow war an dor,

ha'ga gasa dhe doemmhe y'n tewes,

15owth ankevi y hallo troes aga brewi,

y hallo best gwyls stankya warnedha.

16Hi a dhyght hy fleghes yn fell, kepar dell nag esons dhedhi;

nyns yw a vern dhedhi bos euver hy lavur;

17rag Duw a wrug dhedhi ankevi furneth,

ha ny ros dhedhi kevrenn yn konvedhes.

18Mes pan omsav hi rag poenya,

hi a hwerth orth margh ha marghek.

19‘A resys dhe'n margh y grevder?

po gwiska y gonna gans mong?

20A wredh dhodho lamma kepar ha lokust?

Son y renki hwoethus yw euthyk.

21Ev a baw war gamm ha lowenhe yn y grevder;

ha mos yn-rag erbynn arvow an vatel.

22Ev a hwerth orth own, heb bos digolonnek;

ny gildenn ev dhiworth an kledha.

23An woen-sethow a gryghyll er bynn y denewen,

an guw ha'n lons a lughes.

24Ev a lenk an dor gans fellder ha sorr;

ny yll ev sevel stag pan sen an korn.

25Pan sen an korn ev a renk “Aha!”

Ev a vlas an vatel dhiworth pell,

taran an hembrenkysi ha garm an gas.

26‘Yw dha skians ji hag a wra an hok dhe nija,

hag ystynn y eskelli troha'n dyghow?

27Yw dha worhemmynn ji a wra an er dhe nija ughel y'n ebron,

ha drehevel y neyth yn tyller ughel?

28Yma trigys war garrek hag ev a annedh ena,

kleger karnedhek yw y skons.

29A-dhiworto ev a aspi y breydh;

Y dhewlagas a'n gwel dhiworth pell.

30Y fleghes a sugen goes;

hag yma ev y'n tyller may ma tus varow.’