Kynsa Areth Elifaz

1Ena Elifaz an Temanyas a worthybis:

2‘Mar pedhav kewsel orthis, a vydhydh sklandrys?

Mes piw a yll omwitha rag kewsel?

3Otta, ty re dhyskas lies den;

ha ty re grevhas an dhiwla ydhil.

4Dha eryow re dhrehevis an den esa ow trebuchya,

ha ty re fastyas an dhewlin dhifreth.

5Mes lemmyn ev re dheuth dhis, ha heb perthyans os;

ev a'th toch, ha penndegys os.

6A nyns yw dha own a Dhuw dha fydhyans,

ha glander dha fordhow dha wovenek?

7‘Preder lemmyn, piw hag o ankablus a verwis bythkweth?

Po ple feu an dus ewnhynsek treghys dhe-ves?

8Dell welis, an re a ar anewnder

ha hasa trobel a wra aga mysi.

9Gans anall Duw yth ons dhe goll,

ha gans hwyth y sorr yth yns devorys.

10Usa an lew, lev an lew goedh,

dyns an lewyon yowynk, yw terrys.

11An lew krev a dhe goll rag fowt a breydh,

ha kelyn an lewes yw skattrys.

12‘Lemmyn ger a veu dres dhymm yn-dann gel,

ow skovarn a dhegemmeras an hwystrenn anodho.

13Yn mysk prederow anes dhiworth gwelesigethow an nos,

pan goedh kosk down war dus,

14y teuth agha warnav, ha degrena,

hag a wrug dhe'm eskern krena.

15Ena spyrys a dremenas a-dherag ow fas;

gols ow hig a sevis.

16An spyrys a sevis stag,

mes ny yllyn dissernya y semlans.

Yth esa furv a-dherag ow dewlagas;

yth esa taw, ena my a glewas lev:

17“A yll mab-den bos moy gwiryon es Duw?

A yll gour bos purra es y Wrier?

18Hwath yn y servysi ny worr ev fydh mann,

ha'y eledh ev a guhudh a follneth;

19kemmys moy an re usi trigys yn chiow a bri,

hag yma aga sel y'n doust,

neb yw skwattys maga uskis avel goedhan.

20Yntra myttin ha gorthugher distruys yns;

i a verow bys vykken heb denvyth ow kul vri.

21A nyns yw kordenn aga thylda tennys yn-bann?

I a verow, ha heb furneth.”