1An Arloedh a worthybis dhe Job ow leverel:

2‘A yll den kavyllek strivya gans an Ollgalloesek?

Neb a dhadhel gans Duw, gorthybes ev dhodho.’

Gorthyp Job

3Ena Job a worthybis dhe'n Arloedh:

4‘Otta, distyr ov vi; fatell allav gorthybi dhis?

My a gudh ow ganow gans ow leuv.

5My re gewsis unnweyth, ha ny worthybav;

diwweyth, mes ny lavarav moy.’

Diskwedhyans Nerth Duw

6Ena an Arloedh a gewsis orth Job dhiworth an korwyns:

7‘Grogys dha dhiwglun kepar ha gour;

my a wovynn orthis ha ty a dhiskler dhymm.

8A vynnydh diswul ow breus?

A vynnydh ow dampnya rag ty dhe vos ewnhes?

9Eus bregh dhis kepar ha bregh Duw,

a yll dha lev tarenna kepar ha'y lev ev?

10‘Omdekha yn glori ha splannder;

omwisk yn enor ha meuredh.

11Dilesh tardhow dha sorr

mir orth pub den goethus, ha'y uvelhe.

12Mir orth peub yw goethus, ha'y iselhe;

ha stankya war an debeles ple'mons ow sevel.

13Kudh i y'n doust war-barth;

kolm aga fasow y'n bedh.40:13 bedh: Ebrow y'n tyller kudhys.

14Ena my a aswonn

dha leuv dhyghow dhe ri dhis budhogoleth.

15‘Mir orth Behemoth,

a kreatis dell y'th kreatis jy;

ev a dheber gwels kepar hag ojyon.

16Yma y grevder yn y dhiwglun,

ha'y nerth yn begel y dorr.

17Diwedhyn kepar ha kederwydh yw y lost;

giow y dhiwvordhos yw maylys war-barth yn fast.

18Pibennow a vrons yw y eskern,

kepar ha gwelynni a horn yw y eseli.

19‘Ev yw an kynsa yn mysk oberow Duw –

ny yll marnas y Wrier y ladha.

20An menydhyow a dhre boes ragdho,

le may hwari oll an bestes gwyls.

21Ev a wrowedh yn-dann an alow dowr,

kudhys yn mysk an kors y'n wernek.

22An alow dowr a'n kudh yn aga skeus;

helyk an gover a'n kyrghynn.

23Pan vo an avon ow liva, nyns eus own dhodho;

attes yw ev hwath pan herdh Yordan erbynn y anow.

24A yllir y sesya der an dhewlagas,

po maglenna y droen gans antell?