1‘A yllydh tenna Lawethan yn-mes gans higenn-bysk,

po kelmi y daves yn-nans gans lovan?41:1 An gwersow 41:1 bys 41:8 yw niverys 40:25 bys 40:32, ha'n gwersow 41:9 bys 41:34 yw niverys 41:1 bys 26 y'n tekst ebrow ha'n Septuagint.

2A yllydh gorra lovan der y droen,

po gwana y awen gans korsenn?

3A wra ev lies aspysadow dhis?

A gews ev orthis gans geryow medhel?

4A wra ev kevambos genes

ma'n kemmerydh avel gwas bys vykken?

5A wredh gwari ganso kepar ha gans edhen,

po y leshya rag dha vaghtethyon?

6A wra gwikoryon bargenya ragdho?

A wrons y ranna ynter an varchons?

7A yllydh lenwel y groghen a vorwuwow,

po y benn a wuwow pyskessa?

8Mar settydh dalghenn ynno

preder orth an gas; ny'n gwredh nevra arta!

9‘Neb a'n jeves govenek a'y gachya yw toellys;

yth yw tewlys dhe'n dor orth an gwel anodho hogen.

10Nyns yw denvyth fell lowr rag y dhifuna.

Ytho piw a yll sevel a-dheragov?

11Piw a yll omsettya orthiv ma'th attylliv dhodho?

Denvyth yn-dann an nev oll.

12‘Ny dawav a-dro dh'y eseli,

na'y grevder meur na'y furv gader.

13Piw a yll pilya y dhillas a-ves?

Piw a yll dewana y gaspows dhewblek?

14Piw a yll igeri darasow y fas?

Euthyk yw y dhyns oll a-dro.

15Rewyow a skoesow yw y geyn,

deges klos war-barth kepar ha gans sel.

16Yma an eyl mar ogas dh'y gila

ma na yll ayr tremena yntredha.

17Junys yns an eyl dh'y gila;

i a gesklen ma na yllir aga ranna.

18Y striwyow a skatter golow.

Kepar ha kreghyn lagas an bora yw y dhewlagas.

19Faglennow ow leski a fros dhiworth y anow;

ha gwrygh a dan a lamm yn-mes.

20Mog a dheu dhiworth y dhewfrik,

kepar ha dhiworth chek war gors ow leski.

21Y anall a enow glowennow,

ha flammow a deu yn-mes dhiworth y anow.

22Yma krevder trigys yn y gonna,

ha donsya a wra desper a-dheragdho.

23Junys war-barth yn tynn yw krisyow y gig;

fast yns hag anwayadow.

24‘Mar gales avel men yw y golonn,

mar gales avel men-melin a-is.

25Pan sev ev, ownek yw an duwow;

i a gildenn rag own.

26Ny amont an kledha a dhrehedh dhodho,

na'n guw, na'n sethik, na'n pil.

27Ev a dhyght horn kepar ha kala',

ha brons kepar ha prenn poder.

28Ny wra sethow dhodho fia;

kepar ha kulyn yw meyn-towlbrenn.

29Fustow yw reknys avel kulyn ragdho;

ev a hwerth orth an lons ow kryghylli.

30‘Kepar ha darn a briweyth yw y rannow a-is,

ow kasa ol y'n leys kepar ha draylell-dhrushya.

31Ev a wra dhe'n downder bryjyon kepar ha pott;

ha'n mor kepar ha pott a eli.

32War y lergh ev a as ol a wolow;

y hyllir krysi bos blew loes dhe'n downder.

33Travyth war an dor yw y bar,

kreatur heb own.

34Ev a vir yn-nans war bup-tra yw howtyn;

myghtern oll an bestes goethus yw.’