Job

1Ena Job a worthybis dhe'n Arloedh:

2‘My a woer y hyllydh gul pup-tra,

ha ny yll towl ahanas bos lestys.

3“Piw yw hemma, neb a gudh kusul heb godhvos?”

Yn sur my a gewsis a daklow na gonvedhis,

taklow re vryntin ragov dh'aga godhvos.

4“Klew, my a'th pys, ha my a gews;

my a wovynn orthis ha ty a worthyp.”

5My re glewsa ahanas dre glewans an skovarn,

mes lemmyn ow dewlagas re'th welas;

6rakhenna my a'm kas ow honan,

ha koedha yn edrek yn doust ha lusu.’

Pennlavar

7Wosa an Arloedh dhe leverel an taklow ma dhe Job ev a leveris dhe Elifaz an Temanyas: ‘Ow sorr re dhewis er dha bynn hag erbynn dha dhew goweth, drefenn na gewssowgh ahanav an pyth yw ewn, kepar dell wrug ow gwas Job. 8Rakhenna kemmerewgh lemmyn dhywgh seyth tarow ha seyth hordh ha mos dhe'm gwas Job hag offrynna ragowgh offrynn leskys, ha'm gwas Job a bys ragowgh ha my a dhegemmer y bysadow, ha ny'gas dyghtyav herwydh agas follenep; rag ny gewssowgh ahanav an pyth yw ewn, kepar dell wrug ow gwas Job.’ 9Elifaz an Temanyas ha Bildad an Shuhyas ha Sofar an Naamathyas eth ha gul herwydh an pyth a worhemmynnis an Arloedh dhedha; ha'n Arloedh a dhegemmeras pysadow Job.

Rychys Job Asverys

10Wosa Job dhe bysi rag y gowetha, an Arloedh a restoryas feus Job hag a ros dhodho diwweyth moy ages dell esa dhodho kyns. 11Oll y vreder hag oll y hwerydh a dheuth dhodho ha pubonan re'n aswonnsa kyns ha dybri ganso yn y ji. I a'n konfortyas ha keskodhevel ganso a-dro dhe oll an trobel re dhrosa an Arloedh dhodho, ha pubonan a ros dhodho bath a vona ha bysow a owr. 12An Arloedh a vennigas an rann dhiwedhes a vewnans Job moy ages an kynsa. Yth esa dhodho peswardhek mil dhavas, hwegh mil gowrvargh, mil yew a oghen, ha mil asen. 13Hag yth esa seyth mab ha teyr myrgh dhodho. 14Ev a henwis an kynsa myrgh Yemima, an nessa Kesia ha'n tressa Keren-happuk. 15Y'n wlas oll nyns o benynes kevys mar deg avel myrghes Job, ha'ga thas a ros dhedha eretons war-barth gans aga breder keffrys. 16Wosa hemma Job a vewa seyth-ugens blydhen; hag ev a welas y vebyon ha mebyon y vebyon bys y'n peswora henedh. 17Ha Job a verwis, koth ha leun a dhydhyow.