1‘Galw lemmyn; eus nebonan a wra dha worthybi?

Dhe by a'n re sans y hwredh treylya?

2Yn sur sorr a ladh an foll,

hag avi a ladh an sempel.

3My re welas an foll ow kwreydhya,

mes a-dhistowgh my a villigas y annedh.

4Yma y vebyon pell dhiworth sawder,

skwattys yns y'n yet,

ha nyns eus denvyth dh'aga delivra.

5An den nownek a dheber y drevas,

hag ev a's kemmer hwath dhiworth spern;

ha'n dus syghesik a dhyen rag y rychys.

6Rag ny dheu galar dhiworth an doust,

ha ny egin trobel dhiworth an dor;

7mes dineythys yw den dhe drobel

dell wra gwryghon nija war-vann.

8‘My, y hwilsen Duw,

ha dhe Dhuw my a gommendsa ow hen.

9Ev a wra taklow meur hag anhwiladow,

taklow bryntin heb niver.

10Ev a re glaw war an norvys

ha dannvon dowrow war an gwelyow;

11ev a sett an re uvel war-vann,

ha'n re a gyn yw drehevys dhe sawder.

12Ev a lest towlennow an dus fel,

ma na yll aga diwleuv seweni.

13Ev a vagel an dus fur yn aga felder,

ha towlennow an dus sleygh yw dres dhe worfenn yn skon.

14I a vet orth tewlder dydhweyth,

ha palvala y'n hanter-dydh kepar hag y'n nos.

15Mes ev a saw an edhommek dhiworth kledha aga ganow

ha dhiworth leuv an re alloesek.

16Ytho yma govenek dhe'n boghosek,

ha kammhynseth a dhege hy ganow.

17‘Otta, gwynnvys an den a wra Duw y geredhi,

rakhenna na dhispres keredh an Ollgalloesek.5:17 an Ollgalloesek: Ebrow Shadday.

18Rag ev a woli, hag ev a lystenn;

ev a wysk, ha'y dhiwleuv a saw.

19Ev a wra dha dhelivra dhiworth hwegh trobel;

yn seyth ny wra drog mann dha dochya.

20Yn divoetter ev a wra dha dhasprena dhiworth mernans,

hag yn bresel dhiworth nerth an kledha.

21Ty a vydh kudhys dhiworth skorja an taves,

ha ny' fydh own a dhistruyans pan dheffo.

22Orth distruyans ha divoetter ty a hwerth,

ha ny' fydh own a vestes gwyls an norvys.

23Rag ty a' fydh kevambos gans meyn an gwel,

ha bestes an gwel a vydh yn kres genes.

24Ty a wodhvydh bos dha dylda yn kres,

ha ty a hwither dha gorlann, ha ny vydh fowt vyth.

25Ty a wodhvydh ynwedh bos pals dha dhiyskynnysi,

ha dha agh kepar ha gwels an dor.

26Ty a dheu dhe'th vedh yn dha gothni,

kepar dell dheu garr a reunenn war-vann yn hy seson.

27Otta, hemma a hwilsyn ni; yndella yth yw.

Goslow, ha godhvydh e rag dha dhader.’