Gorthyp Job dhe Elifaz

1Ena Job a worthybis:

2‘Unnweyth a pe poesys ow foenvos,

hag oll ow therroes settys y'n mantolyow!

3Rag ena y fia poessa ages tewes an mor;

rakhenna ow geryow re beu diswar.

4Rag yma sethow an Ollgalloesek6:4 Ollgalloesek: Ebrow Shadday. ynnov;

ow spyrys a yv aga gwenon;

browaghow Duw yw arayys er ow fynn.

5A veg an asen gwyls pan y'n jeves gwels,

po a vedhygel an ojyon a-ugh y voes?

6A yll neppyth anvlasus bos dybrys heb hoelan,

po eus blas yn sugen an malow?

7Ow ewl boes a nagh aga thochya;

yth yns kepar ha boes yw kasadow dhymm.

8‘Unnweyth a teffa ow gorholedh dhe geweras,

hag unnweyth a rolla Duw dhymm ow gobaith;

9may pe plegadow dhe Dhuw ow skwattya,

dhe livra y leuv ha'm treghi dhe-ves!

10Ow honfort via hemma,

lemmel rag joy a wrussen yn payn dibita;

rag ny neghis vy geryow an Sans.

11Pyth yw ow nerth ma'm bo govenek?

Ha pyth yw ow gorfenn, may hylliv pargh?

12Yw ow nerth an nerth a veyn,

po yw ow hig a vrons?

13Nyns eus galloes ynnov dhe omweres,

ha sewena yw herdhys dhiworthiv.

14‘Neb a skon a ri tregeredh dh'y goweth

a forsak own a'n Ollgalloesek.

15Traytus yw ow breder kepar ha gover,

kepar ha goverow a dremen dhe-ves,

16hag yw tewl gans rew,

ha le mayth omgudh an ergh.

17Yn termyn a doemmder desyghys yns;

pan yw toemm gyllys yns dhiworth aga le.

18An karavanow a dreyl dhiworth aga hyns;

yth ons yn-bann dhe'n difeyth, ha mos dhe goll.

19An karavanow a Tema a hwila dowr,

an dremenysi a Sheba a vir gans govenek.

20Toellys yns rag aga bos fydhyansek;

i a dheu di ha toellys yns.

21Yndella yth owgh hwi dhymm lemmyn;

hwi a wel ow therroes hag yma own dhywgh.

22A leveris vy, “Rewgh dhymm ro”?

Po “Dhiworth agas rychys profyewgh falswober ragov”?

23Po “Delivrewgh vy dhiworth leuv an eskar”?

Po “Dasprenewgh vy dhiworth leuv arwaskoryon”?

24‘Dyskewgh dhymm ha tawel vydhav;

gwrewgh dhymm konvedhes fatell gammwrug vy.

25Ass yw geryow onest galloesek!

Mes agas keredh – pandr'a geredh?

26A dybowgh y hyllowgh keredhi ow geryow,

ha bos kows den yn desper kepar ha gwyns?

27Hwi a wrussewgh tewlel prenn war an omdhivas hogen,

ha kesvargenya rag agas koweth.

28‘Mes lemmyn, bedhes plegadow dhis mires orthiv;

ny wrav vy gowleverel sur dh'agas fas.

29Treylyewgh, my a'gas pys, na vedhes kammhynseth gwrys.

Dasprederewgh lemmyn, mater a'm glander yw.

30Eus kammhynseth war ow thaves?

A ny yll ow stevnik dissernya terroes?